Быйыл оройуоммут сиригэр-уотугар хас да күннээх дохсун ардахтар түһэннэр уу мотуога тахсар куттала үөскүү сырытта. Оройуон киинигэр сыһыы уута бөһүөлэккэ киирэн хас да ыал тэлгэһэлэригэр уу халыйда. Ыһыахтыыр сирбитин уу ылан быйыл ыһыах ыытыллыбата. Ол да буоллар дьыл саамай уһун күнүгэр, бэс ыйын 21 күнүгэр, өбүгэлэрбит үтүө үгэстэрин тутуһан күн көрсүүтүн сиэрэ-туома ыытылынна. Былыр-былыргыттан сахалар бу күнү өрө тутан, улаханнык суолталаан үрүҥ күнү көрсөллөр, айыыларга үҥэллэр-көрдөһөллөр, ыһыах ыһаллар. Быйыл үрүҥ күнү уруйдуур тустаах сиэр-туом Кыайыы болуоссатыгар ыытылынна. Алгысчыт Ирина Николаевна Слепцова — Аптаах Дукку тэрээһиҥҥэ кэлбит дьоҥҥо күнү көрсүү алгыһын хайдах ыытары кэпсээн-көрдөрөн биэрбитэ дьон сэҥээриитин ылла. Бэлиэтээн эттэххэ, быйыл күнү көрсүү тэрээһинигэр элбэх киһи кэлбит, урукку сылларга маннык элбэх киһи, сүрүннээн эдэр дьон сылдьыбат буолара. Күммүт тахсарын балачча күүтэн араас хамсаныылары үөрэттибит. Онтон үрүҥ күммүт сардаҥалара былыт быыһыттан көстөллөрүн кытта алгысчыт Ирина Слепцова — Аптаах Дукку, бар дьону алҕаан, айылҕаттан бары үтүөнү көрдөһөн туран сиэри-туому ыытта. Киниэхэ алгысчыт Юрий Черов аал уоту оттон көмөлөстө. Маны таһынан Юрий Прокопьевич оройуон дьаһалтатын аатыттан мустубут дьону үрүҥ тунах ыһыах күнүнэн эҕэрдэлээтэ, алгыс маанытын анаата. Алгыс ылбыт дьон дууһалыын чэпчээн, эрэл санаанан туолан ыһыахха сылдьыбыт курдук сананнылар. Күнү көрсүү алгыһын салҕаан ойдоруулаах оһуохай, этитиилээх эһиэхэй ыытылынна. Оһуохай тылларын культура управлениетыттан Айталина Николаева таһаарда. Алгыстаах оһуохай кэнниттэн ыалдьыттар Арчы дьиэтин далбар хотуттара бэлэмнээбит сахалыы астарынан айах минньитэн үүммүт күнү үтүө санаанан көрүстүлэр.
Христина Кривошапкина