Билии күнүгэр анаммыт үөрүүлээх линейка Муома орто оскуолатыгар үрдүк тэрээһиннээхтик ыытылынна. Тэрээһин саҕаланыытыгар ыытааччылар Эрчимэн Атласов уонна Анна Слепцова хас биирдии кылааһы, кинилэр салайааччыларын истиҥник билиһиннэрдилэр. Кылаастар бары киирбиттэрин кэннэ перекличка оҥорон дьону сэргэхситттлэр. Бу кэнниттэн үөрэммит оскуолаларыгар Билии күнүн бүтэһигин бэлиэтиир выпусниктар киирдилэр. Мустубут дьон кинилэргэ ситиһиилээх үөрэх дьылын баҕаран дохсун ытыс тыаһынан көрүстүлэр. Салгыы Муома орто оскуолатын боруогун саҥа атыллыыр 5-с кылаас үөрэнээччилэрэ салайааччыларын Никифорова С.С. уонна Калугина А.Г. кытта долгуйа-үөрэ киирдилэр.
Үтүө үгэс быһыытынан Российскай Федерация уонна Саха Республикатын былаахтарын өрөгөйдөөх көтөҕүүгэ Муома орто оскуолатын саха тылыгар уонна литэрэтиитигэр үрдүк категориялаах учуутала, СӨ үөрэҕириитин туйгуна, XXII республиканскай педагогическай ярмарка кыайыылааҕа Т.И.Данилова уонна үчүгэй үөрэхтээх, «Зарница» байыаннай патриотическай оонньуу кыайыылааҕа Тимофей Маныкин, СР культуратын туйгуна, «Халбас харата» мини-театр артыыһа Виталий Старков уонна Арассыыйа таһымнаах элбэх күрэхтэһиилэр, олимпиадалар кыттыылааҕа, «Красный калейдоскоп» норуоттар икки ардыларынааҕы фестиваль лауреата Юрий Алехин кытыннылар. Государственнай гимнэр кэмнэригэр мустубут дьон иһийэн турдулар. Тылы бастакынан ылбыт сскуола директора Василина Тихонова үөрэнээччилэри, учууталлары, төрөппүттэри саҥа үөрэх дьылынан эҕэрдэлээн туран быйыл оскуолаҕа учууталынан үлэлии киирбит Светлана Никифорованы, атын оскуолаттан төннөн кэлбит убаастыыр учууталларын Алена Калугинаны билиһиннэрдэ. Үөрэнээччилэри саҥа 2026-2027 үөрэх дьылынан «Муома оройуона » МО баһылыга Дмитрий Аммосов, оройуон борокуруора Айсен Готовцев, оройуоннааҕы үөрэҕирии управлениетын салайааччытын э.т. Елена Жиркова эҕэрдэлээтилэр. Үрдүк ситиһиилээх саҥа үөрэх дьылын уруйдаан Муома орто оскуолатын бастыҥ үөрэнээччитэ Сайнаара Алексеева уонна Муома алын сүһүөх оскуолатын бастыҥ выпускнига Алеша Ильин алтан чуорааны чугдаарда тыаһаттылар.
Быйылгы үөрэх дьылыгар Муома алын сүһүөх оскуолатыгар 21 үөрэнээччи оскуола боруогун аан-бастаан атыллаата. Урукку сылларга биир кылааска итиччэ оҕо үөрэнэрэ. Сыллата оҕо аҕыйаан иһэрэ нэһилиэнньэ ахсаана көҕүрүүрүн көрдөрөр. Маҥнайгы кылаастары уопуттаах учуутал, СӨ үөрэҕириитин туйгуна Мария Слепцова уонна эдэр кэскиллээх учуутал Варвара Корякина эрэллээх илиилэригэр ыллылар. Үөрэх саҥа дьылынан оҕолору, учууталлары уонна төрөппүттэри оройуон баһылыга Дмитрий Аммосов, оройуоннааҕы үөрэҕирии салаатыттан методист Клара Корякина, ветеран учуутал Антонина Слепцова, Муома алын сүһүөх оскуолатын директорын э.т. Татьяна Иманова эҕэрдэлээтилэр. Салгыы маҥнайгы кылаас үөрэнээччилэрэ оскуоланы уруйдаан хоһоон аахтылар. Манна ким эрэ доргуччу ааҕан, ким эрэ долгуйан умнан кэбиһэн төрөппүттэрин долгуттулар. Саҥа үөрэх дьылын арыйар тэрээһини домовенок Кузя кэлэн сэргэхситтэ. Боччумуран турбут оҕолор билэр геройдарын көрөн тэҥҥэ оонньостулар. Түмүккэ маҥнайгы кылаас үөрэнээччилэрэ Дайаана Карпова уонна Алик Алехин алтан чуорааны лыҥкыначчы тыаһатан оҕолору бастакы уруоктарыгар ыҥырдылар.
Христина Кривошапкина