Оройуоҥҥа ыам ыйын бүтүүтүгэр орто оскуоланы бүтэрэр 96 үөрэнээччитигэр, ол иһигэр тохсус кылааһы 64, уон биирис кылаас 32 выпускниктарыгар тиһэх чуораан чугдаарда.
Долгутуулаах бэлиэ күҥҥэ бэл сайыҥҥылыы куйааһырбыт айылҕабыт, чаҕылыччы тыкпыт күммүт тэҥҥэ үөрсэр. Муома орто оскуолатын тэрээһинин учууталлар Анна Слепцова уонна Елена Неустроева хомоҕой тылларынан иилээн-саҕалаан ыыттылар. Ыытааччылар хас биирдии кылаас сыллааҕы түмүктэрин билиһиннэрэллэр. Манна “Зарница 2.0” байыаннай-патриотическай оонньуу кыайыылаахтара, бэһис кылаастар икки ардыларыгар оскуола иһинэн ыытыллыбыт “Снайпер” күрэх боруонса мэтээл хаһаайыннара уонна Арассыыйатааҕы “Вызов первых” бырайыак оройуоннааҕы күрэх иккис миэстэлээх 5 «а» (кыл. сал. Л.В. Сидорова), Арассыыйатааҕы “Родной язык и культура: традиции и современность” конференция иккис степеннээх дипломаннара 5 «в» (Т.И. Данилова), М.Ю. Лермонтов икки сүүс сааһыгар аналлаах литературнай айымньыларынан инсценировкаларга уонна Российскай наука күнүгэр биллиилээх ученайдар стендэлэрин куонкуруһун кыайыылаахтара 5 «в» (М.Н. Хабарова), “Белый олененок” өрөспүүбүлүкэтээҕи ускуустуба оҕо бэстибээлин бастакы степеннээх лауреаттара, “Вызов первых” бырайыак бастыҥнара 6 «а» (К. И. Неустроева), 6-8 кылаас кыргыттарын икки ардыларыгар волейбол күрэҕин кыайыылаахтара, 6-7 кылаас уолаттарыгар “Хотугу Хоһуун” волейбол күрэҕин боруонса мэтээл хаһаайыттара 6 «б» (Р.Е. Слепцов), Улуу Кыайыы 80 сылыгар аналлаах уус-уран айымньы бэстибээлин уонна онно аналлаах 5-7 кылаастарга строевой хаамыы, ырыа күрэҕин кыайыылаахтара 7 «а» (С.Е. Винокурова), оҕо туризмын бэстибээлин кыайыылаахтара 7 «б» (И.П. Софронова), региональнай волонтерскай эдэр армеецтар “Максим” этэрээккэ чилиэннэрдээх 7 «в» (И.М. Турантаева), “Кэскил” оҕо бэчээтин өрөспүүбүлүкэтээҕи медиа-киин кыттыылаахтара, “Арассыыйатааҕы “Бастыҥнар хамсааһыннара” чилиэннэрэ, оройуоннааҕы оҕо ускуустубатын оскуолатын “Туундара үөрүүтэ” ырыа-үҥкүү норуот бөлөҕүн иитиллээччилэрэ 8 «а» (А.П. Эверстова), 11-15 саастаах оҕолорго оройуоннааҕы “Безопасное колесо” суол быраабылатыгар интеллектуальнай оонньууга иккис миэстэлээх, бары тэрээһиннэргэ саамай көхтөөх 8 «б» (А.Г. Калугина), оскуола иһинэн омук тылыгар “Полиглот” күрэх уонна оҕо туризмыгар 9-11 кылаастарга муҥутуур кыайыылаахтара 9 «а» (А.П. Ефимова), “Снежный барс” спортивнай оонньуу үрүҥ көмүс призердара, М.Ю. Лермонтов айымньыларынан инсценировкаларга “ Лучшее музыкальное оформление” номинация кыайыылаахтара 9 «б» (Н.В. Старкова), Улуу Кыайыы 80 сылыгар Аҕа дойду сэриитигэр аналлаах историяҕа конференция оскуолатааҕы түһүмэҕин кыайыылаахтара 10 кылаас (А.И. Корякина) үөрэнээччилэрэ бааллар.
Оскуола бүтэһик боруогун атыллаан Муома орто оскуолатын технологическай уонна психологическай-педагогическай кылаастар 19 выпускниктара кылаас салайааччыларын Алена Тогмитова уонна Андрей Громов арыаллаах тахсыбыттарын мустубут төрөппүттэр, ыҥырыылаах ыалдьыттар уруйдуу көрсөллөр. Педагогическай кылаас “Чуораанчык” уһуйааны кытта бииргэ үлэлэһэн практика ааспыттар. Технологическай кылаас “Моя первая профессия” региональнай бырайыак кыттыылаахтара. Выпускниктар М.К. Аммосов аатынан ХИФУ өйөбүлүнэн “Оператор беспилотных авиационных систем” эбии үөрэхтээһин куурсун бүтэрбиттэр.
Үөрэх дьылын түмүктүүр сүрүн тэрээһинигэр Саха сиригэр үүнэр көлүөнэни патриотическай тыыҥҥа иитиигэ кылаатын иһин Федор Попов аатынан “Сердце патриота” бэлиэ хаһаайына, Победа, Афродита, Эльбрус, Казбек хайаларын дабайбыт турист-экстремал Леонид Алексеевич Никулин, СӨ үөрэҕириитин туйгуна, Саха сирин бастыҥ учуутала, анал бириэмийэ хаһаайына Анна Петровна Ефимова уонна үөрэнээччилэртэн В.П. Ларионов аатынан «Инникигэ хардыы» XXIX эдэр чинчийээччилэр өрөспүүбүлүкэтээҕи научнай конференциятын лауреата, Н.И. Лобачевскай аатынан X Бүтүн Арассыыйатааҕы “История народов России” научнай конференцияҕа (Казань к.) иккис степеннээх дипломана Виолетта Горохова, В.П. Ларионов аатынан «Инникигэ хардыы» XXIX эдэр чинчийээччилэри өрөспүүбүлүкэтээҕи научнай конференция маҥнайгы степеннээх дипломана, Арассыйатааҕы “Первые шаги в науке” оҕо чинчийэр уонна айар үлэтин куонкуруһугар маҥнайгы степеннээх дипломана (Москва к.) Вадим Егоров Арассыыйа уонна Саха сирин судаарыстыбаннай былаахтарын үөрүүлээх быһыыга-майгыга өрө көтөхтүлэр.
Оҕолору оройуон Аҕа баһылыга Дмитрий Аммосов, олохтоох нэһилиэк дьаһалтатыттан Вероника Атласова, оскуола директора Василина Тихонова, бастакы учууталлара Майя Местникова, бэтэрээн учуутал Вера Никулина, Улуустааҕы үөрэҕирии управлениетын начальнига Айталина Крупышева, оройуон култууратын эйгэтин салайааччыта Юрий Черов уо.д.а. оскуоланы бүтэрэр үөрүүлээх күннэринэн истиҥ эҕэрдэлэрин тиэртилэр, наҕараадалары туттартаатылар, оттон төрөппүттэр оҕолоругар олох киэҥ аартыгын үктэлигэр алгыс тылларын анаатылар. Выпускниктар үөрэппит учууталларыгар кыһамньылаах, бэриниилээх үлэлэригэр сүгүрүйэр, төрөппүттэригэр көмөлөрүн иһин истиҥ махтал тылларын эттилэр.
Муома орто оскуолата бэлиэ күҥҥэ сыл устата үөрэхтэригэр саамай кыһамньылаах, дьоҕурдаах туйгун үөрэнээччилэр ортолоругар араас хайысхаларынан ыытыллар күрэстэр көрдөрүүлэрин түмүгүн таһаарар үтүө үгэстээх. Быйыл бэһис кылаастарга бастыҥтан бастыҥ Арассыйатааҕы “Родной язык и культура: традиции и современность” научнай конференция үһүс степеннээх дипломана, саха тылыгар уонна литературатыгар өрөспүүбүлүкэтээҕи олимпиадаҕа үһүс миэстэлээх Егорова Викторияҕа (99 баал) “Первая ступенька” номинация кыайыылааҕын туоһулуур аалай лиэнтэни оскуола музейын салайааччыта Антонина Никулина кэтэрдэр.
6-7 кылаастарга С.Р. Кулачиков Эллэй 120 сааһыгар аналлаах өрөспүүбүлүкэтээҕи бэстибээл хоһоон ааҕааччылар куонкурустарын бастакы степеннээх дипломана Егоров Вадим 63 баалынан уонна 8-9 кылаастарга “Зеленые пионеры” өрөспүүбүлүкэтээҕи конференцияҕа бырайыага үһүс миэстэҕэ тиксибит, Бүтүн Арассыйатааҕы биология уонна нуучча тылыгар олимпиада муниципальнай түһүмэҕэр уонна өрөспүүбүлүкэтээҕи саха тылыгар уонна литературатыгар олимпиада призердара Слепцова Светлана 95 баалынан бастыҥнар буоллулар. Кинилэргэ учууталлар, наукаҕа уонна үөрэх чааһыгар директоры солбуйааччылар Иннокентий Ефимов, Ольга Капитонова Школьные годы чудесные” номинацияны туоһулуур аалай лиэнтэлэри иилэллэр.
10-11 кылаастарга Казань куоракка научнай конференция иккис миэстэлээх, “Инникигэ” хардыы“өрөспүүбүлүкэтээҕи конференция лауреата, “Муус устар” ыччат бэстибээлин өрөспүүбүлүкэтээҕи “Первые вместе” слетун кыттыылааҕа Горохова Виолетта 105,5 ылан, оскуола директора Василина Тихоноваттан “Через тернии к звездам” номинацияны туоһулуур аалай лиэнтэни кэтэр.
Салгыы оскуола туйгуннарын ортолоругар “В начале было слово” филология эйгэтигэр бары таһымҥа чаҕылхай билиитин көрдөрөн, бэһис кылаас үөрэнээччитэ Егорова Виктория (77,5 баал) МОО саха тылын уонна литературатын учууталыттан Татьяна Даниловаттан аалай лиэнтэни кэтэр. История уонна обществознание эйгэтигэр В.П. Ларионов аатынан «Инникигэ хардыы» XXIX эдэр чинчийээччилэр өрөспүүбүлүкэтээҕи научнай конференцияҕа “Общественный выбор” куонкурус түмүгэр эдэр учуонайдар Сэбиэттэрин анал бирииһин хаһаайына, “Открой в себе ученого” уон иккис Бүтүн Арассыыйатааҕы научнай-инновационнай конференцияҕа иккис миэстэлээх уонна чинчийэр үлэтэ Новосибирскайдааҕы университет “Международная научная студенческая конференция” уонна “Инникигэ хардыы” начунай-практическай конференция сборниктарыгар киирбит Неустроев Герман 127 баалынан “Здесь каждый камень летопись сама” номинация кыайыылааҕынан ааттанна уонна история учуутала Руслан Сидоровтан аалай лиэнтэни кэттэ. Физика, математика эйгэтигэр норуот депутата Гаврил Алексеев бирииһигэр “Энергетики будущего” олимпиада төрдүс степеннээх дипломана, оройуон иһигэр саахымат, дуобат күрэхтэрин кыайыылааҕа, Бүтүн Арассыыйатааҕы “Инноваторы” олимпиада кыттыылааҕа Слепцов Альберт 60 баалынан “Дух упорства и вдохновения” номинацияҕа тигистэ. Төрүт (естественный) цикл предметтэригэр Бүтүн Арассыыйатааҕы “Берегите планету! Земля – наш общий дом! викторина кыайыылааҕа, химия, биология уонна медицина хйысхатыгар “Инникигэ хардлыы” научнай конференция муниципальнай түһүмэҕин бастакы степеннээх дипломана, иккис сылын бу эйгэҕэ туйгунунан ааттанар Слепцова Светлана 61 баалы ылан, “Пытливые умы” номинацияҕа бастыҥ буолла. Оскуола саамай айар талааннаахтарын ортолоругар “Талантиум” театральнай студия иитиллээччилэрэ, оҕо уонна ыччат уон сэттис норуоттар икки ардыларынааҕы “Мы можем!” куонкурс кыайыылаахтара Архипов Константин уонна Слепцов Альберт 37-лии баалы ыланнар, “Восходящее солнце” номинацияҕа бастыҥнарынан аатаннылар. Спорт эйгэтигэр “Эвинек” бырааһынньыгар 9-11 кылаастарга “Хонил, чиктил, эҥил” (Солнце, зовущее в даль) научнай конференция спортивнай күрэх түһүмэҕэр хотугу многоборьеҕа абсолютнай кыайыылаах, өрөспүүбүлүкэтээҕи физическэй култуураҕа олимпиада муниципальнай түһүмэҕин призера Ильина Виола (86 баал) “К вершинам спорта” номинацияҕа кыайыылаах ааты ылла.
Оскуола үөрүүлээх тэрээһинэ выпускниктар вальс үҥкүүлэринэн түмүктэннэ. Үөрэх туйгуннара Константин Архипов, Никита Семенов (11 кыл.), Герман Неустроев, Светлана Слепцова (9 кыл.) үөрэх түмүгүн биллэрэн, тиһэх чуорааны тыаһаттылар,. Выпускниктары аны сүрүн тургутуу, биир кэлим эксээмэннэр күүтэллэр.
Алтан чуораанынан чугдааран
Аастылар үөрэммит сылларгыт,
Бүтэһик чуораанынан лыҥкынаан
Бүттүлэр оҕо саас кэмнэргит.
Билиигэ, көрүүгэ баҕаҕыт
Биллэ илик суоллары арыйдын
Кэнэҕэс оскуола кыһаҕыт
Киэн тутта ааккытын ааттаатын!
Бары выпускниктарга туруоруммут сыалларын ситиһэллэригэр, эксээмэннэрин ситиһиилээхтик туттаралларыгар баҕарабыт. Үөрэммит оскуолаҕытын умнумаҥ, төрөөбүт дойдугутугар туһалаах дьоһун дьон буолуҥ!
“Муома оройуона” МО пресс-сулууспата