Өрөбүл күннэргэ икки күн устата оройуоммут олохтоохторо “Радость тундры» оҕо норуодунай ансаамбылын үҥкүү-ырыа аргыстаах чаҕылхай кэнсиэрин көрөн, Саҥа дьыл бырааһынньыктааҕы тыынын иҥэринэн, сынньалаҥнарын астына атаардылар.
Субуота күн «Осикат” этнокултуурунай киинигэр оҕо ускуустубатын оскуолатын (дириэктэр Федорова А.М.) уһуйуллааччылара талааннарын көрдөрдүлэр. Кэнсиэр үс түһүмэххэ араарыллан бэркэ таҥыллан оҥоһуллубутун көрөөччүлэр сэҥээрдилэр. Бастакы түһүмэххэ эбээн норуотун култууратын үҥкүүлэрин, ырыаларын оҕолор көрдөрдүлэр. Эбээн тылын иҥэринэн илдьэ сылдьар ытык киһибит Мария Гаврильевна Корякина истиҥ эҕэрдэтин тиэртэ. Салгыы эбээннии ырыалар, үҥкүүлэр дьиэрэйдилэр. Түһүмэх эрчимнээх һээдьэнэн түмүктэннэ. Иккис түһүмэҕи саха култууратын өрө тутар алгысчыт Ирина Николаевна Слепцова арыйда. Кини көрөөччүлэри уран тыллаах алгыһынан айхаллаата, хомоҕой тылынан уруйдаата. Саламалаах үҥкүү, хомуска дьүрүһүтүү, кыра уолаттар чабырҕахтара, норуот ырыалара көрөөччү сэҥээриитин ыллылар, дохсун ытыс тыаһынан саала иһин толордулар. Үһүс түһүмэх бииргэ сомоҕолоһон олорор норуоттар доҕордоһууларын көрдөрөн, нууччалыы тылынан ыытылынна. Оскуола уопуттаах преподавателэ Надежда Ивановна Скоробогач ыалдьыттарын өрө көтөҕүүлээхтик эҕэрдэлээтэ. Салгыы нууччалыы ырыалары, араас омук дьэрэкээн үҥкүүлэрин бииртэн-биир оҕо сыанаҕа тахсан кэлбит ыалдьыттарга бэлэх уунна. Быйыл алтынньы ыйыгар Кытайга баран, ансаамбыл үрдүк ситиһиигэ тиксибитин бары билэбит. Онно Гала-кэнсиэргэ талыллан киирбит, Улуу Кытай норуотун сэҥээриитин ылбыт “Дружба” ырыа-үҥкүү нүөмэрэ дьоро киэһэни түмүктээтэ.
Иккис күнүгэр Оҕо ускуустубатын оскуолатын иитиллээччилэрэ уонна салайааччылар Индигирдээҕи норуот айымньытын дьиэтигэр киэҥ бырагыраамаларын олохтоох дьоҥҥо көрдөрдүлэр. Буор Сыһыы көрөөччүлэрэ оҕолорбут талааннарын сөҕө көрөн, кэнсиэри сэргээн астына дуоһуйдулар. Кэнсиэр биир тыынынан умсугутуулаахтык ааһан олохтоох дьон дириҥ махталларын ылла.
Оҕо ускуустубатын оскуолатын дириэктэригэр А.М.Федороваҕа, оҕолорбут талааннарын арыйбыт бары педагогтарга, Кытай сиригэр илдьэ сылдьыбыт салайааччыларга, чуолаан Г.Г.Чероваҕа, А.А.Николаеваҕа, нүөмэрдэри бэлэмнээбит преподавателлэргэ истиҥ тылынан махтанан төрөппүттэр анал бэлэхтэрин туттардылар.
“Радость тундры” норуодунай ансаамбыл оройуоммут аатын аар-саарга өссө да аатырда туруохтун, ситиһии кынаттаннын, үүнэ-сайда чэлгийдин!
Айталина Николаева