Арассыыйаҕа Дьиэ кэргэн, Саха Өрөспүүбүлүкэтигэр Оҕо саас, Муома оройуонугар Аҕа сылларын чэрчитинэн «Чуораанчык» уһуйааҥҥа бу дьыл сэтинньи 28 күнүгэр бэрт сэргэх хамсаныылаах сонун тэрээһин — «Хомуур күрэх — 2024» ыытылынна.
Уһуйааҥҥа сылдьар кырачаан оҕолоруттан саҕалаан улахан бөлөх иитиллээччилэригэр дылы бары кытыннылар. Оҕолорун чөл олоххо уһуйар, эт-сиин сайдыытыгар кыһаллар төрөппүттэр туора турбакка кэлэн күрэхтэстилэр.
ХОМУУР КҮРЭХ оҕо бары өттүнэн сайдыытыгар олус туһалаах саҥа сахалыы оонньуу буолар. Улаатан эрэр оҕолор түргэн хамсаныылара, сымсалара, сытыы харахтара, мындырдара, толкуйдууллара барыта сайдар, эрчиллэр. Төрөппүттэр олус сэҥээрдилэр, үлэ бириэмэтигэр олорон көһүйбүт эти-сиини хамсатарга үчүгэй дьарык эбит диэн быһаардылар.
Хомуур күрэх ааптарыгар, сүүрүк, спортсмен-экстремал, урбаанньыт Владимир Петрович Емельяновка күүс-көмө, сүбэ-ама буолбутугар, бэйэтэ «Хомуур» диэн ырыатын үллэстибитигэр барҕа махталбытын тиэрдэбит. Бу оонньууну ааптар бастаан тренировочнай тренажёр курдук айбыт эбит, кэнники 2013 сылтан киэҥник тарҕанан өрөспүүбүлүкэбит уһуйааннара, оскуолалара, оҕо лааҕырдара маннык күрэхтэри тэрийэн ыытар буолбуттар.
Биһиги уһуйааммыт өрөспүүбүлүкэтээҕи «Эркээйи эргиирэ» бырайыакка пилотнай былаһаакка буолан оҕолорго сахалыы тыыны иҥэрэр, омук быһыытынан уратыбытын арыйар тэрээһиннэри ыытар. Хомуур күрэх сылын аайы ыытыллар үтүө үгэс буолуо диэн эрэллээхпит.
Хомуур күрэх
