От ыйын 1-2 күннэригэр өрөгөйдөөх Өймөкөөн сиригэр «Айыы санаа айана» XVI Олоҥхо Ыһыаҕа бэрт тэрээһиннээхтик ыытыллынна. Биһиги оройуоммутутуттан Хонууттан 7 киһи, Улахан Чыыстайтан үс ансаамбыл: “Һээку”, “Һоҥҥачаан”, уонна “Эгдьэн Муола” дьиэ кэргэн ансаамбыла кыттыыны ыллылар. Чыыстайдар хотугу норуоттар түһүлгэлэригэр ситиһиилээхтик кыттыннылар.
Ол курдук Ыһыах аһыллыытын култуурнай программатыгар, араас конкурстарга эвен норуотун култууратын, национальнай таҥаһын күүскэ пропагандалаатылар. Өбүгэлэрин уус-уран айымньыларын уһун үйэлээбиттэрин үрдүктүк сыаналаан дьүүллүүр сүбэ биһиги биир дойдулаахтарбытын араас номинациянан бэлиэтээтэ. Ол курдук «Һэку» ансамбльга «Эбээннии хоһуйан дьиэрэтии», «Сценаҕа үрдүк толоруу» номинациялар иҥэрилиннилэр. «Һоҥҥачаан» оҕо ансамбыла аҕыйах ахсааннаах норуот тылынан уус-уран толорууга иккис миэстэҕэ тахсан 30000 солк. бирииһи тутта. «Эбээн норуотун өс хоһоонноро» анал аат хаһаайкатынан Ольга Тарабукина буолла. Ыһыах аҕыйах ахсааннаах норуоттар культураларыгар анаммыт күрэс гран-при хаһаайкатынан Зоя Садовникова тахсан 50000 солк. бирииһинэн бэлиэтэннэ. Онон чыыстайдар ыалыы сытар оройуоммутугар тиийэн улахан ситиһиилэнэн эргилиннилэр. Быйыл аан бастаан Муоматтан олоҥхоһуттар күрэхтэригэр биһиги биир дойдулаахтарбыт холонон көрдүлэр. Олоҥхоһуттар улахан түһүлгэлэригэр култуура үтүөлээх үлэһиттэрэ Анна Федорова, Ирина Слепцова, култуура управлениетын салайааччыта Юрий Черов аан бастаан кыттан кэккэ ситиһиилэннилэр, дьүүллүүр сүбэ кинилэри бэлиэтии көрөн инникитин да кытталларыгар сүбэлээтэ. 200 тахса олоҥхоһуттартан 20 бастыҥ иһигэр киирэн биһиги дьоммут бары анал номинацияҕа тигистилэр, харчынан бириис ыллылар. Ол курдук, Анна Митрофановна «Кылыһах ырыалаах», Ирина Николаевна «Олоҥхо ырыатын дэгэтэ», Юрий Прокопьевич «Удьуор утумун тутар» анал ааттар хаһаайыннарынан буоллулар. Биллэрин курдук, хотугу оройуоннарга олоҥхоһуттар олох аҕыйахтар, онон үс олоҥхоһуппут анал аатынан биһирэммиттэрэ биһигини үөрдэр. Муома оройуонун делегациятын аҕа баһылыкпыт Дмитрий Аммосов салайан сырытта. Муомалары Төрүт бөһүөлэгэ шефтэһэн баай-талым остуолунан күндүлээтэ, олорор усулуобуйаҕа үөскүүр боппуруостары быһаарсарга көмөлөстө. Биһиги телевизорынан көрөн биир дойдулаахтарбытыгар олус диэн ”ыарыйдыбыт”, кинилэр ситиһиилэринэн киэн тутуннубут. Оройуоммутугар олоҥхо сайдыытыгар оҥкул уурулунна, салгыы тустаах үлэ күүскэ барыа, эдэр олоҥхоһуттар иитиллэн тахсыахтара диэн эрэнэбит.
“Муома оройуона” МТ пресс-сулуууспата.