Кулун тутар 28 күнүгэр «Осикат» ЭКК ырыа эриэккэс түһүлгэтэ тэрилиннэ. Саха Өрөспүүбүлүкэтин култууратын туйгуна Елизавета Тарабукина үөрүүлээх үбүлүөйүн уруйдаан иитиэхтээн таһаарбыт бырайыагын уочараттаах кэнсиэрин бар дьонугар бэлэх уунна. Ырыа күрэҕэр чугас сытар нэһилиэктэртэн уонна оройуон кииниттэн тустаах бөлөхтөр кытыннылар. Маны таһынан ааспыт сыллар гран-при хаһаайыннара күрэҕи көҕүлээтилэр. Бу күрэх сонун көстүүтүнэн олохтоох ДЭС бөлөҕүн толоруута буолла. ДЭС-тэр ырыа толорууларын көрөөччүлэр көхтөөх ытыс тыаһынан доҕуһуоллаатылар. Соболоох орто оскуолата икки бөлөҕү бэлэмнээн кэлбитэ дьон сэҥээриитин ылла. Чыбааҕылаах нэһилиэгин «Дойдууна»ансаамбыла куолаһынан арахсан олус табыллан ыллаан ырыа куттаах дьон үрдүк биһирэбиллэринэн сыаналанна. «Түмсүү» ансаамбыл биирдиилээн бастыҥ ырыаһыттары түмэн күрэҕи көҕүлээтэ. Элбэхтэ эрчилиннэхтэринэ тыас таһаарар бөлөх буолуохтарын сөп эбит. Полиция сотрудниктарын «Эрэл» бөлөҕө доҕордоһуу туһунан бэрт истиҥ ырыа ыллаан дьон билиниитин ылла. Конкурсаннар бастакы түһүмэххэ Муома оройуонун мелодистарын ырыаларын толорбуттара төрөөбүт оройуоммут 95 сыллаах үбүлүөйүгэр туспа бэлэх курдук буолла. Иккис түһүмэххэ бөлөхтөр сөбүлүүр ырыаларын көрөөччүлэр дьүүллэригэр таһаардылар. Куонкуруһу көрө олорон кыттааччылар сценическэй көстүүмнэрин хайгыы көрдүм. Бары олус кэрэтик киэргэммиттэр, саҥа көстүум бөҕө тиктибиттэр. Елизавета Дмитриевна өр кэмнээх үлэтин уоппута дьайан күрэстэһээччилэр үрдүк сценическай культураны көрдөрөн улаханнык үөртүлэр. Түмүккэ, куонкурус жюритын быһаарыытынан күрэх гран-при кыайыылааҕынан «Эрэл» бөлөх таҕыста. Иккис степеннээх лауреат Соболоох орто оскуолатын эр хоһууттарын бөлөҕө буолла, үһүс степеннээх лауреат аатын «Дойдууна» ансаамбыл ылла. Бу дьоро киэһэ «Ыллыаҕыҥ эрэ, доҕоттор!» бырайыак ааптара Елизавета Дмитриевна Тарабукинаны 70 сааһын туолбут өрөгөйдөөх үбүлүөйүнэн култуура тэрилтэлэрэ, доҕотторо, дьиэ кэргэнэ истиҥник эҕэрдэлээн бэлиэ бэлэх туттардылар.
