Кыайыы 80 сылыгар анаммыт художественнай самодеятельность «Салют, Победа!» фестивала салҕанар. Ол курдук, олунньу 27 күнүгэр Соболоох нэһилиэгин анал концертнай программата элбэх киһини түмпүтэ. Тэрээһин уус-уран быыстапкаттан саҕаламмыта. Көрөөччүлэр Соболоох айар талааннаах дьонун үлэтин сөҕө биһирээбиттэрэ. Элбэх хаһаайка Ольга Шкулева күрүчүөгүнэн баайбыт ыскаатарын, орон сабыытын ымсыыра көрдө. Наһаа да уустук, тулууру, бириэмэни эрэйэр үлэни оҥорбут диэн хайҕаатылар. Айталина Федорова тикпит унтуулара, бэргэһэлэрэ көрөөччү болҕомтотун тартылар.
Эдэр худуоһунньук Валерия Никулина харандааһынан уруһуйдаабыт портреттара көрбүтү эрэ кэрэхсэттилэр. Соболоохтор айар талааннаах дьонноругар суолта биэрэн тустаах стендэ ыйааннар элбэх киһи сэҥээриитин ыллылар.
Кыайыыны уруйдуур концертарын сэриигэ анаммыт композицията олус табыллыбыт. Кылгас кэмҥэ сэрии сүрүн түгэннэрэ бары сырдатылыннылар. Манна бааллар 5 уолаттарын сэриигэ сүтэрбит саха дьахтара — ытык ийэ Феврония Малгина, Ленинград блокадатын сиэртибэтэ Таня Савичева, Ильмень күөл хорсун-хоодуот хайыһардьыттара, Кыайыы былааҕын күөрэччи анньыбыт Саллаат уонна да атын уобарастар. Бу барыта тустаах үҥкүүлэринэн, хомоҕой хоһооннорунан доҕуһуолланан биир тыынынан ылылынна. Олус үчүгэй. Манна биири сэҥээрэ бэлиэтээтим: хас саҥа хартыынаҕа кыттар дьон күүттэриитэ-кэтэһиннэриитэ суох лоп бааччы сценаҕа тахсан иһэллэрин. Ити элбэхтэ ыытыллыбыт репетиция түмүгэ уонна сцена кэннигэр үлэлиир дьон дьаһаллара. Сэрии кэнниттэн олоҕу чөлүгэр түһэрэр колхоз үлэтин көрдөрөр нүөмэрдэр көрөөччү сэҥээриитин ыллылар. Аныгы олоҕу туоһулуур рэп толоруута сонун буолла. Чабырҕахсыт кыргыттар көрөөччүлэри үөрдэ сэргэхситтилэр. Сцена ветерана Ульяна Гореева сөбүлээн ыллыыр Саллаат туһунан «короннай» ырыата бу да сырыыга «бис», «браво» хаһыынан доҕуһуолланна. Концерт көрө олорон Соболооххо эдэр ыччат элбээбитин биһирии көрдүм. Ол аата нэһилиэк сайдар кэскиллээх буоллаҕа. Кыайыы өрөгөйдөөх үбүлүөйүн көрсө ыытыллар фестиваль элбэх киһини түмэ тарта, сомоҕолоото.
Христина Кривошапкина