Бөлүүн хаар кыратын түстэр, сарсыарда халлаан тымныйдар да, ону ол диэбэккэ оҕолуун-улаханныын бары тэрээһиннээхтик таҕыстылар. Бырааһынньыктыы киэргэммит колонналар бииртэн-биир ааһаллар. Инники колоннаҕа өлбөт үйэлээх полкатыгар Аҕа дойду сэриитин кыттыылаахтарын мэтириэттэрин туппут ыччаттар бааллар. Бүгүн дойдубутугар Ытык сэриигэ норуоппут дьолун, көҥүлүн иһин тыыннарын толук уурбут биир дойдулаахтарбытын, оҕо-саас диэни билбэтэх эһэлэрбитин-эбэлэрбитин санаан ааһар ытык күммүт.
Трибунаҕа оройуон Аҕа баһылыга Дмитрий Аммосов, нэһилиэк баһылыга Иван Дягилев, бэтэрээннэр оройуонааҕы сэбиэттэрин бэрэссэдээтэлэ Евдокия Слепцова, ыччат отделын испэсэлииһэ Калерия Атласова тахсаннар Улуу Кыайыы үбүлүөйдээх сылынан эҕэрдэлэрин тиэрдэллэр. Дмитрий Викторович аҕыйах хонуктааҕыта Донецкай, Луганскай өрөспүүбүлүкэлэргэ сылдьан байыаннай дьайыыга ытык иэстэрин толоро сылдьар биир дойдулаахтарбытын көрсүбүтүн ахтар. Түмүккэ Аҕа дойду сэриитин кыттыылааҕа Александр Васильевич Рачинскай хос сиэнэ Мирослав Нартович трибунаҕа тахсан, саҥа көлүөнэ дьон кыайыыны уһансыбыт бэтэрээннэргэ былыта суох эйэлээх нус хас олорорбут иһин төлөммөт ытык иэстээхпит диэтэ.
Аҕа дойду Улуу сэриитин кыттыылаахтарыгар аналлаах обелискаҕа гирлянда ууруллар. Ону тэҥэ байыаннай дьайыыга кыттан сырдык тыыннарын олус уурбут ыччаттарбытыгар оскуола оҕолоро чиэс биэрэн тыыннаах сибэкки дьөрбөтүн уураллар, корзина сибэкки уонна гирлянда ууруллар.
Бырааһынньыктааҕы нүөмэрдэри 80 киһи кыттыылар түөрт уонча паара Кыайыы вальсата киэргэттэ. Үҥкүүнү “Осикат” култуура киинин үлэһитэ Любовь Федорова туруорбутун диктор биллэрэр.
Кыайыы күнүгэр аналлаах тэрээһиннэр салҕаналлар. Мустубут дьоҥҥо балыыһа үлэһиттэрэ бэлмнээбит полевой куукуналара үлэлээтэ. Дьон саллаат хааһытын тото-хана амсайдылар.