Олунньу 17 күнүгэр Соболоох нэһилиэгэр уон алта сыл буолан баран СССР спордун маастара Федот Слепцов бирииһигэр тустууга күрэхтэһии Соболоох орто оскуолатын спортивнай саалатыгар үрдүк таһымнаах буолан ааста. Тэрээһиҥҥэ Муома оройуонун аҕа баһылыга Д.В.Аммосов, оройуон баһылыгын 1 солбуйааччыта А.А.Тарабукин, Соболоох нэһилиэгин баһылыга Э.Г.Павлов , орто оскуола директора Р.Е Старкова истиҥ тылларынан эҕэрдэлээн Федот Николаевичка өйдөбүнньүк бэлэх туттардылар. Салгыы көрөөччүлэринэн туолбут саалаҕа күрэхтэһиини үөрүүлээхтик арыйыы буолла . Манна орто оскуола эрэттэрин ,кэрэ аҥардарын эҕэрдэ ырыалара , үҥкүүлэрэ тэрээһини киэргэттилэр . Күрэхтэһиигэ Орто Дойдуттан , Хонууттан , Победаттан , Соболоохтон күрэхтэһээччилэр кэлэн кытыннылар. Россия, Республика гимнэринэн былаахтары көтөҕүү чиэһэ Соболоох кэскиллээх спортсменыгар, Д.П.Коркин аатынан Чурапчытааҕы спортивнай оскуола 7 кылааһын үөрэнээччитигэр Эльдар Березкиҥҥа тигистэ. Тыҥааһыннаах киирсиилэр түмүктэригэр бастыҥ бөҕөс аатын Эльдар Березкин ылла уонна Ф.Н. Слепцов уолаттарынаан туруорбут анал бириистэрин тутта. Бастыҥ техникатын иһин Соболоох орто оскуолатын 11кылааһын үөрэнээччитэ Артур Шкулев, Кыайыыга дьулуурун иһин Георгий Скачковскай (Муома орто оскуолата) анал бириистэр хаһаайыннарынан буоллулар. Тустууну сэргэ күрэхтэһээччилэр хапсаҕайга күөн көрүстүлэр. Бэрт элбэх спонсордаах тустуу түһүлгэтэ бэрт тэрээһиннээхтик ыытыллан дьон-сэргэ сэҥээриитин ылла, Соболооххо өтөр буолбатах спорт улахан түһүлгэтинэн буолла.
Николай Корякин