Олунньу 13 күнүгэр оройуон саҥа модельнай устааба бэчээттэнэн тахсыбыта. Бу туһунан Оройуоннааҕы депутаттар Сэбиэттэрин бэрэссэдээтэлэ Серафим Мараказов маннык быһаарар.
— Биллэрин курдук, ааспыт сыл бүтүүтүгэр СӨ Ил Түмэнэ олохтоох бэйэни салайыныы туһунан өрөспүүбүлүкэ саҥа Сокуона ылыллыбыта. Бу сокуон туһунан сонуннары киэҥник тарҕатар сириэстибэлэргэ элбэхтэ таһааран тураллар. Кылгастык тохтуур буоллахха, сокуон ылыллыан иннинэ өрөспүүбүлүкэбит Төрүт Сокуонугар уларыйыылар киирбиттэрэ. Алтынньы 10 күнүгэр Ил Түмэҥҥэ аһаҕас (публичнай) истиилэр ыытыллыбыттара. Маныаха Төрүт Сокуоммут олохтоох бэйэни салайыныыга сыһыаннаах 97-с, 100-с уонна 101-с ыстатыйаларыгар уларыйыылар киирбиттэрэ. Бу уларыйыылар “Былаас биир кэлим тиһигэр олохтоох бэйэни салайыныыны тэрийии уопсай бириинсиптжрин туһунан” 33-ФЗ №-дээх Федеральнай Сокуон ирдэбиллэригэр сөп түбэһиннэрэн киллэриллибиттэрэ.
Онон Ил Түмэнинэн олохтоох бэйэни салайыныы туһунан СӨ саҥа Сокуона ылыллыбытын кэнниттэн, оройуооммутугар уонна нэһилиэктэргэ бэйэлэрин Устааптарын саҥа редакциятын ылыныы курдук эппиэттээх кэмэ кэллэ. Оройуон модельнай устааба бэчээккэ тахсыбытын кэнниттэн биир ый иһигэр оройуон таһымыгар оройуон депутаттара, уопсастыбаннас кыттыылаах киэҥ аһаҕас дьүүллэһии ыытыллыахтаах.
Нэһилиэктэргэ устааптара таҕыстаҕына ый иһинэн эмиэ аһаҕс дьүллэһиилэр тэриллиэхтээхтэр. Бу тэрээһин үлэтэ ити үөһэ ыйыллыбыт 33-ФЗ №-дээх Сокуон быһыытынан үс ыйга болдьохтонон, муус устар 1 күнүгэр диэри устааптар федеральнай сокуоҥҥа сөп түбэһиннэрэн сөптөөх уларыйыылары, дьүүллэһиилэри кэмигэр ааһыахтаахтар.
«Муома оройуона» МО пресс-сулууспата.