Дьокуускай куоракка ветераннарга ыытыллыбыт дьоро киэһэни Муома талааннаах ыччаттара ылбаҕай ырыаларынан, үрдүк үҥкүүлэринэн киэргэттилэр.
Бастакынан сценаҕа таҕыста Егор Громов, опера уонна балет театрын кэскиллээх артыыһа, кини баай куолаһынан Фёдор Лобановы санатан «Сахам сирэ» ырыаны итэҕэтиилээхтик толордо. Дария, Дмитрий Дмитриевтар уоллара Костя аҕатын оҕо эрдэҕинээҕитин санатан сырдык үҥкүү бэлэхтээтэ. «Туймаада» государственнай ансаамбыл солиһа Николай Роббек бэйэтин кэрэ куолаһынан биир дойдулаахтарын үөртэ. Ырыаһыт убайдарыттан харыс да хаалсыбакка эдэр ырыаһыппыт Аурика Черова Николай, Василий Слепцовтар ырыаларын ыллаан Индигир кырдалларын бу баардыы көрдөрдө. Саха Өрөспүүбүлүкэтин үтүөлээх артыыската Екатерина Корякина күүстээх куолаһын сөҕө-махтайа иһиттибит. Муомалар күтүөттэрэ Иннокентий Оҕочооноп эҕэрдэ ырыатын ветераннар истиҥник ылыннылар. Салгыы кэргэнниилэр толорбут дуэттара улахан сэҥээриини ылла. Балет оскуолатыгар Муома оройуонуттан элбэх оҕо үҥкүү алыптаах эйгэтигэр уһуллар эрээри ким дойдутугар сайылыы тарҕаһан, ким гастролга баран муомалар ааттарыттан кэрэчээн кыыспыт Минаш Калдарбаева нарын үҥкүү бэлэхтээн биир дойдулаахтарын долгута үөртэ. Концеры аатырбыт мелодиспыт Андрей Старков, Хонуу уола түмүктээтэ. Ветераннарбыт эдэр саастарын эргитэн, ырыаҕа уйдаран үҥкүүлээн тэйдилэр, оһуохайдаан ойдулар.