Бу күннэргэ оройуоммутугар үгэс буолбут өрөспүүбүлүкэтээҕи тустаах киин мобильнай биригээдэлэрин күһүҥҥү көрүүтэ тэрээһиннээхтик ыытылынна. Биригээдэ салайааччыта Дьулустаан Данилов кэпсээбитинэн Муома оройуонугар 630 киһи доруобуйатын бэрэбиэркэлэппит, онтон 7 ыарыһаҕы салгыы Дьокуускай куоракка обследованиеҕа ыыппыттар. Нэһилиэнньэ мобильнай биригээдэ быраастарыгар көрдөрөр кэмнэригэр араас анализтары туттарбыттар, УЗИ, ЭКГ, СМАД барбыттар, холтер кэппиттэр. Биригээдэҕэ терапевт, кардиолог, онколог, гинеколог,эндокринолог, невролог, пульмонолог, офтальмолог, травматолог, лор врачтар үлэлээтилэр. Маны таһынан лаборант, медперсонал бааллар. Биригээдэ ыраах сытар Төбүлэх нэһилиэгэр сырыытын биһиги общественнай корреспондеммыт Людмила Стручкова маннык сырдатар:
Мобильнай биригээдэ Чуумпу Кытыл сэлиэнньэтигэр дьон доруобуйатын кыһамньылаахтык бэрэбиэркэлээтэ. Нэһилиэнньэ улахан састааптаах быраастар биригээдэлэригэр истиҥник махтанар. Үлэни, сынньалаҥы дьүөрэлээн Ю.А Слепцов аатынан норуот айымньытын дьиэтин үлэһиттэрэ Анастасия Никулина, Рудольф Макаров, олохтоох ФАП үлэһиттэрэ Алия Колесова, Туйаара Стручкова үлэ чааһын кэнниттэн эмчиттэргэ анаан корнхолл, дартс, уулусса биллиардыгар күрэхтэһии ыыттылар. Людмила Алексеевналыын тус кэпсэтиигэ биригээдэ салайааччыта, УЗИ бырааһа Дьулустаан Борисович бэйэтин туһунан кылгастык билиһиннэрбит. Ол курдук кини бу идэтинэн үлэлээбитэ 10-тан тахса сыл буолбут эбит. Салайар биригээдэтэ Арктика 13 оройуонугар уонна Ленскэй, Өлүөхүмэ, Нам, Уус-Алдан, Бүлүү бөлөх оройуоннар ыарахан суоллаах-иистээх нэһилиэктэригэр үлэлээбиттэрин билиһиннэрдэ. Сылдьыбыт оройуоннарыгар нэһилиэнньэ ордук сүрэх уонна харах ыарыыларыттан ордук эмсэҕэлиирин кэпсээтэ. Мобильнай биригээдэни ханнык да оройуоҥҥа эйэҕэстик көрсөллөрүн бэлиэтээн туран Дьулустаан Борисович муомаларга истиҥник махтанна. Оттон олохтоохтор айан бырайыаһа үрдүү турар кэмигэр маннык биригээдэлэр олус наадалаахтарын эттилэр, инникитин да бу олус туһалаах үлэ тохтооботугар көрдөстүлэр. Дьон доруобуйатын туһугар ыраах айантан толлубат үрүҥ халааттаах аанньалларга махтал буолуохтун!
Биһиги корр.