Бу күннэргэ Муома оройуонугар Саха Республикатын тыатын хаһаайыстыбатын миниистирин солбуйааччы Сахаяна Павлова оробуочай сырыыга кэлэн сырытта.
Тустаах көрсүһүүгэ Сахаяна Афанасьевна маннык иһитиннэрии оҥордо:
— Муома оройуонугар быйыл сайын тыа хаһаайыстыбатыгар улахан хоромньулаах күүстээх ардахтар түстүлэр. Биһиги Муома, Чыбааҕылаах, Соболоох нэһилиэктэригэр сылдьан сыһыылар ууга барбыттарын илэ харахпытынан итэҕэйэ көрдүбүт. Тастан көмө- өйөбүл оҥоһулуннаҕына эрэ сүөһү иитиитэ салгыы сайдыыһы. Онон тустаах ууттан эмсэҕэлээбит хаһаайыстыбаларга кыалларынан көмө оҥорору сөптөөх диэн саныыбын. Маны таһынан инникитин ходуһаларга мелиоративнай үлэ күүскэ ыытыллара уолдьаспыт. Манна анал техника ылыытыгар көмөлөһүөхпүт. Нэһилиэктэргэ сылдьан хоту сир усулуобуйатыгар оҕуруот аһа дэлэччи үүнэрин бэлиэтии көрдүм. Хас оскуола аайы агрокылаастар арыллан үлэлииллэригэр усулуобуйа оҥоруохха сөп эбит. Оҕолору кыра эрдэхтэриттэн сиргэ сыһыаран ииттэххэ эрэ тыабыт хаһаайыстыбатын кэскиллиэхпит. Сахая Афанасьевна бэйэтэ өр сылларга ыччаты иитиигэ үлэлээбит буолан, тыа сиригэр сайдыы суола ыччат илиитигэр баарын тоһоҕолоон бэлиэтээтэ. Онуоха көмө- тирэх буолар «Агростартап», «Молодой фермер», маны таһынан дьиэ кэргэн грана анал программалар баалларын кэпсээтэ.
Биһиги оройуоммут киинигэр ынах сүөһү, сылгы уулуссаларга мэччийэрэ мэлдьэх буолбатах. Бу сайын бөһүөлэккэ сатыы сылдьыы ити сүөһүлэртэн сылтаан уустуктана сылдьыбыта. Сахая Афанасьевна маны бэлиэтии көрөн сылгы бөһүөлэктэн 20 км. ыраах сиргэ иитиллиэхтээҕин, ынахтарга бостуук баар буолуохтааҕын санатта. Сахая Афанасьевна анал байыаннай дьайыы буола турарынан дойдуга тыа хаһаайыстыбатын бородууксуйатын күүскэ бэлэмнээһин ирдэнэрин санатта. Байыаннай кэмҥэ ас-үөл хааччыллыыта дойдуга куттал суох буолуутун биир ирдэбилэ буолар. Муома оройуонугар таба ахсаана сыллата эбиллэ турара үчүгэй көрдөрүү буолар диэн миниистир
солбуйааччыта бэлиэтээтэ.
Маны таһынан кэнники сылларга Соболоох нэһилиэгэр сылгы ахсаана биллэ элбээбитин ыйда. Көрсүһүү түмүгэр Муома оройуонун дьаһалтатын уонна Саха Республикатын тыатын хаһаайыстыбатын министерствотын икки ардыларыгар тыа хаһаайыстыбатын бородууксуйатын үрдэтиигэ (обеспечение продовольственной безопасности) анаммыт Сөбүлэҥ илии баттанна.
Христина Кривошапкина.