Уһун, тымныы кыһыннаах хоту дойдуга харыларын күүһүнэн сыралаһан ынах сүөһүнү, сылгыны иитэн олорор өбүгэлэрбит тохсунньу бүтүүтүн дьыл оройо дииллэр, итиэннэ кыстыкка киириэхтэн төһө от сиэммитин, төһө хаалбытын ааҕыналлара-суоттаналлара.
Сүөһү иитэр дьарыктаах, үлэ үлүскэнигэр сылдьар кыһарҕаннаах кыһыны туоруур өбүгэлэрбит баччаларга
«Хайа, кыстык хайдаҕый?» диэн сураһар үгэстээхтэр.
Онон Индигир нэҺилиэгим олохтоохторуттан төрүт үгэспитин тута сылдьар дьоммутуттан кыстыгы сурастым.
Санаан аастахха…
2025 сыл от ыйын 15-16 күннэригэр Индигир эбэбит хаатыттан тахсан, мотуогунан моһуоктаан үгүс түбүгү-садьыгы, эрэйи эҥэрдээн, хоромньу, ороскуот охсуутун таһаарбыта.
Айылҕа содула ыараханын үрдүнэн үлэни өрө туппут, тулуурдаах, санаалара күүстээх олохтоохтор барахсаттар хомуллан, биир сүрүн төрүт дьарыктарынан буолбут сүөҺү, сылгы иитиитин ыҺыктыбакка, быыс- хайа5ас буланнар,оттооннор сүөҺүлэрин кыстаттылар.
Олохтоохтор саха сиэринэн сэмэйдик, «этэҥҥэ» диэбиттэриттэн кыстык үчүгэйдик ааһан эрдэҕэ диэн саныыгын.
Александра Егоровна Слепцова:
-Кыстыкка Индигир нэҺилиэгэр 38
төбө ынах сүөҺү кыстаан турар. Бүгүҥҥү күҥҥэ сэттэ ынах төрөөтө.Сиир от кэмчи со5ус, оттуур сирдэр ууга баран ситэ оттоммотохпут. Комбикорм, эбии от кэллэр, этэннэ туоруохпут этэ.
Бэйэм ына5ым быйыл эрдэ, ахсынньы 29-гар төрөөтө.
Мотрена Васильевна Никулина:
-Кыстык этэҥҥэ , ынах- сүөҺү төрөөн эрэллэр.
Евдокия Иннокентьевна Слепцова:
-Улахан ыараттары сүөҺүлээх дьоммут көрсө сырыттылар, сүөҺү аҺылыгар.
Уу тахсан уустук сайын аастар да, кыстык син этэҥҥэ ааҺан эрэр . СүөҺүлээх дьоммут ынахтара төрөөннөр үүккэ киирдибит.
Сылгылаах дьон сылгыларын, убаҺаларын хаайан, хаардаан, аҺылыкка киллэрэн тураллар. Билигин да өссө күөххэ үктэнэрбит ыраах, онон атын улуустан кэлиэхтээх от түргэн со5устук, суол учугэй эрдэ5инэ эрдэ кэлэрэ буоллар диэн бары эрэнэ күүтэбит.
Вера Иннокентьевна Слепцова:
-СүөҺүлэр барахсаттар төрөөн эрэллэр, үксэ тыҺы торбостор диэн олохтоохторбут үөрэллэр.
Марья Арьяновна Шкулева:
-НэҺилиэк этэҥҥэ. СүөҺү-ас, үлэ-хамнас да үчүгэй. Күммүт уһаата. Барыта кэминэн.
Кыстык эриэ-дэхси баран иһэр эбит, ынахтар төрөөн эрэллэр.
Ити эрээри быһа этиллибэт, мантан саас күн-дьыл тугу көрдөрүө биллибэт.
Тохсунньуттан саҥа аһыллыбыт кыһыҥҥы суол муус устар ортотуттан сабыллар, онон бириэмэ ыгым. Оту, комбикорму, атын да наадалаах ас-үөл — барыта бириэмэтигэр кэллин диэн ба5а санаабын тиэрдэбин.
Түмсүүлээх буолуохха,
Биир санааланыахха,
Саҥаны арыйыахха,
Сэргэхтик олоруохха.
Светлана Сен-Дун- Шен