«Салют, Победа!» фестиваль дьону салгыы түмэр. Бу сырыыга Хонуу сэлиэнньэтин олохтоохторун болҕомтотугар Чыбааҕылаах нэһилиэгин конкурснай программата дьүүлгэ турда.
Чыбааҕылаахтар инники конкурсаннартан уратыта диэн кэнсиэрдэрин уу сахалыы ыыттылар. Көрөөччүлэр ансаамбыл да биирдиилээн да ырыаһыттар куоластарын сэҥээрэ иһиттилэр.
Чахчы да куолас мааны дьоно. Киһи эрэ истэ олоруох курдук. Чыбааҕылаах нэһилиэгин культуратын киинигэр хореограф штата көрүллүбэт. Онон үҥкүүлэри Орто Дойдутааҕы оскуола учуутала Мария Рожина туруорбут. Дьон бэлиэтии көртө буолуо үҥкүүлэр хамсаныылара үҥкүү кэмигэр ситэн-хотон түмүктэнэллэрин, элеменнэрэ сөпкө таҥыллыбыттарын. Олус үчүгэй үҥкүүлэр, Сайдыы аҕыйах ахсааннаах нэһилиэнньэтиттэн итиччэ элбэх үҥкүүһүтү булар да уустук буолуо. Кэнсиэргэ видеосюжеттары таҥан туттубуттара сонуннук көһүннэ. Киэн туттар биир дойдулаахпыт, Аҕа дойду Улуу сэриитин кыттыылааҕа Максим Черемкиҥҥа ананан айыллыбыт хоһооннор дьон болҕомтотун тартылар. Улахан убайдарын Максим Дмитриевич хорсун быһыытыгар иитиллибит Чыбааҕылаах хорсун-хоодуот уолаттара билигин анал байыаннай дьайыыга геройдуу кытта сылдьалларын көрөөччүлэр тустаах видеоҕа уонна быыстапкаҕа турбут стендэҕэ көрдүлэр. Чыбааҕылаахха араас дьарыктаах дьон олорорун быыстапка экспонаттарын көрөн итэҕэйдибит. Дьахтар аймах оҕуруоттан тиһиллибит дьэрэкээн киэргэллэри умсугуйа көрдө. Сорохтор кыайыыны уһансыбыт аҕам дьон хаартыскаларын ортотугар бэйэлэрин аймахтарын булан үөрдүлэр. Фестиваль кэнсиэрэ Муома оройуонугар кэлбит Кыайыы знамятын эстафетатын ылыынан түмүктэннэ. Ол курдук, оройуон киинин аҕа баһылыга Иван Дягилев Чыбааҕылаах нэһилиэгин аҕа баһылыгар Игорь Громовка Ленскэй оройуонуттан кэлбит Кыайыы Знамятын дохсун ытыс таһыныытынан доҕуһуолланан туттарда. Улуу Кыайыы 80 сылыгар анаммыт тэрээһиннэр бииргэ алтыспыттара дьон сэҥээриитин ылыан ыллылар.