Сааскы кэрэ бырааһынньыгы көрсө, дьахталлар Аан дойдутааҕы күннэринэн «Индигир долгуннара» вокальнай ансаамбыл Чыбааҕылаах нэһилиэгэр ыалдьыттаата. Сарсыардаттан эрдэ айаннаан тиийдибит. Орто Дойдутааҕы сынньалаҥ дьиэтин үлэһиттэрэ бэрт истиҥник көрсөн, сылаас чэйинэн күндүлээтилэр. Бастаан маастар кылаастар ыытылыннылар. Ол курдук, «Ис кыаххын таба туһан» диэн ааттаах сиэлинэн, ротанганан оҥоһуктарга үөрэтии, “Махтал” ыраастаныы сиэрин-туомун билиһиннэрии барда.
Нэһилиэк эдэр ийэлэрэ, далбар хотуттара маастар кылаастарга сылдьан, билбфэтэхтэрин билэн, сатаабатахтарын сатаан астыннылар.Ол курдук Ирина Никулина кылтан тымырдаайы оҥорорго үөрэттэ, Айталина Эверстова ротанганан сибэкки иһиттэрин, корзиналары оҥоттордо. Түмүгэр маастар-кылаас толору сыалын ситэн, кыттааччылар үлэлэрин түмүгүн көрөн астына дуоһуйдулар.
Маастар кылаастар кэннилэриттэн «Ис сүрэхтэн»диэн ааттаах төгүрүк остуол тула олорон истиҥ кэпсэтии, оонньуулар ыытылыннылар. Ансаамбыл салайааччыта Г.Черова бэйэтин үтүө сүбэтин-аматын кэлбит ыалдьыттарга тиэртэ.
Олохтоох бибилэтиэкэр Т.Корякина «Бу кимий?» диэн бэрт интэриэһинэй оонньууну икки хамаанданан тэрийэн ыытта. Хонуулар, олохтоохтор күөн көрүстүлэр. Оонньуу оройуоммут тэриллибитэ 95 сылыгар ананна.Истиҥ көрсүһүү, күрэх кэнниттэн “Эн ыллаа, бу дьолу айхаллаан” эҕэрдэ кэнсиэр бэрт сэргэхтик ааста.
Көрөөччүлэр хас биирдии нүөмэри дохсун ытыс тыаһынан көрүстүлэр,
Кэнсиэри Юрий Черов хомоҕой тылынан салайан ыытта. Эдэр ырыаһыттар Р.Дьяконов, В.Аммосов кэрэ аҥаардарга анаан, ылбаҕай ырыаларын бэлэхтээтилэр, кэнсиэри тупсаран, ситэрэн-хоторон биэрдилэр.
Чыбааҕылаах нэһилиэгин олохтоохторо кыттааччыларга сандал саас кэрэ күнүн, ылбаҕай ырыа киэһэтин бэлэхтээбиттэригэр махтал тылларын, өссө да сайда-үүнэ туралларыгар алгыстарын тиэртилэр.
“Индигир долгуннара” ансаамбыл кэлэктиибин аатыттан Чыбааҕылаах нэһилиэгин олохтоохторугар, ЭКК «Осикат» дириэктэригэр А.Варламовка, суоппар В. Жирковка махтанабыт.
Айталина Николаева