Биһиги оройуоммут хоту дойду маанылаах кыыла — таба иитиитинэн дьарыктанар. Кэнники сылларга таба ахсаана биллэрдик эбиллэрэ үөрдэр.
Ол эрэн ыстаада көс олоҕо, табаһыт үлэтэ романтика буолбатах. Ону бары да өйдүүбүт. Сылы эргиччи аһаҕас халлаан анныгар үлэлиир манан аҕай буолбатах. Кыһын бытарҕан тымныыттан, буурҕаттан, сайын курулас ардахтан, бырдахтан-ньаалаҕайтан иҥнибэккэ, өрөбүлэ-сынньалаҥа суох, дьонноруттан тэйэн хас эмэ көстөөх сиргэ, киҥкиниир киэҥ халлаан анныгар кыһын балаакканан олорор усулуобуйаны киһи эрэ барыта тулуйбат.
Табаһыттар көс олоҕунан олороллор. Ыстаада сирэ тэпсиллибэтин курдук аҕыйахтыы хоно-хоно көһөн иһэллэр.
Дьэ, маннык усулуобуйаҕа аныгы эдэр дьон тэһийэн улэлииллэр дуо?
Индигир нэһилиэгэ үс ыстаадалаах. Бэркичэх ыстаадатыгар (биригэдьиир Пётр Потапов) куоракка улааппыт Гаврил Горохов ахсыс сылын табаһыттыыр. Кимтэн кииннээх, хантан хааннаах буоларын билиһиннэрэр буоллахха, Ганя оройуоҥҥа таба иитиитэ сайдарыгар улахан кылаатын киллэрбит биллиилээх табаһыт Гаврил Петрович Слепцов — 2 (Аччыгый Хабырылла) сиэнэ буолар. Ийэтэ Венера Горохова өбүгэлэрин төрүт иис ньымаларын илдьэ сылдьар талааннаах иистэнньэҥ. Венера Гаврильевна дьиҥнээх патриот, төрөөбүт Муоматын өрөспүүбүлүкэҕэ эрэ буолбакка, региональнай иис күрэхтэригэр эмиэ ааттатар, һээдьэһит.
Ганя ыстаадатын, табаларын сөбүлүүр. Эдэр киһи өбүгэлэрин утумнаан кинилэр төрүт дьарыктарын — таба иитиитигэр үлэлии сылдьарын көрөн киһи үөрэр.
«Кыҥырайдаахха» Альберт Терешкин төрдүс сылын табаҕа үлэлиир. Алик аҕата Альберт Константинович бу биригээдэ биригэдьиирэ. Табаҕа үлэлээбитэ быданнаата.
Эдэр табаһыты кытта көрсөн кылгастык кэпсэттибит.
— Ыстаадаҕа төрдүс сылым. Бэйэм бэйэбэр сылдьарым үчүгэй.
Табаларбын сөбүлүүбүн.
— Табаларгын хайдах араараҕын? Мин көрдөхпүнэ бары биирдэр дии.
—Араарабын. Бары ааттаахтар. Саамай сөбүлүүр табам —
Чоппер. Аан маҥнай бэйэм үөрэппит табам.
— Иллэҥ кэмҥэр тугу гынаҕын? Эдэр дьоҥҥо чуҥкук буолуо ээ. Интернет эҥин диэн баар дуу? Сибээскит хайдаҕый?
— Иллэҥ кэм суох. Биригээдэбитигэр аҕыйах буоламмыт барытын бэйэбит оҥоробут. Күн бүтэн хаалар. Сибээс кыстыыр базабытыгар эрэ баар.
— Инники туох былааннааххын, Алик?
— Көстөн иһиэ.
Алик дьонугар, аймахтарыгар, бииргэ үөрэммит кылааһынньыктарыгар»Прибиэт» ыытта
Өбүгэлэрин төрүт дьарыктарын салгыыр эдэр табаһыттарга таһаарыылаах үлэни баҕарыаҕыҥ.
Валентина Старостина