Олунньу саҥатыгар оройуон баһылыгын, нэһилиэктэр сыллааҕы үлэлэрин отчуота саҕаланна. Биир
бастакынан Индигир национальнай нэһилиэгин баһылыга Прокопий Федоров олохтоохтору кытта
көрсүһүүнү тэрийдэ.
Отчуокка нэһилиэккэ сүрүн соругунан тыа хаһаайыстыбатын салаатыгар уонна бөһүөлэк ис-тас
көстүүтүн тупсарыытыгар үлэ туһаайыллыбыта ахтылынна. Ол курдук ааспыт сылга тыа хаһаайыстыбатын
салаатыгар 1 250 тыһ.солк. көрүллүбүт, таба иитиитигэр – 500 тыһ.солк, сылгыга – 400 тыһ.солк уонна сүөһү
аһылыгын куораттан тиэйэн аҕалыыга 350 тыһ. солк. туттуллубут. Бөһүөлэк тупсарыытыгар сыаллаан
убаҕас бөҕү-сыыһы мунньар полигон оҥоруутугар 1 850 тыһ.солк. ороскуоттаммыт. Киин ититэр ситимигэр
7 ыал холбоммут, онно туттар матырйааллары куораттан таһыыга 300 тыһ.солк. барбыт.
Буор Сыһыы оройуон кииниттэн саамай чугас сытар бөһүөлэк эрээри, кыһыннары-сайыннары өрүһү
туораан сылдьаллар. Онон олохтоохтор бөһүөлэк өрүһү нөҥүөлээн сытарын учоттаан оптовай табаары
тиэрдиини, итиэннэ кыһыҥҥы суолу муниципальнайтан өрөспүүбүлүкэ таһымнаах “Индигир суоллара”
Муоматааҕы учаастагын реестрыгар киллэрэри туруорсаллар. Онон үүммүт сылга бөһүөлэккэ барар суол
статуһун уларытарга уонна бөһүөлэк иһинээҕи суол пааспардарын, докумуоннарын оҥорор сорук турар
эбит. Бөҕү-сыыһы мунньар полигоҥҥа диэри суолга таас кутуохтаахтар. Нэһилиэнньэни улаханнык
долгутар оскуола тутуутун боппуруоһа бэбиэскэттэн түспэт. Үүммүт сылга олохтоохтор былырыын киэҥ
иэннээх сибээс бөһүөлэккэ холбонуохтааҕын үөрэ истибиттэрэ, ол быйыл олоххо киирдэр диэн бүччүм
санаалаахтар. Хаарбах туруктаах дьиэлэртэн көһөрүү программата аҕыйах нэһилиэнньэлээх пууннарга
үлэлиэхтээх. Онон кэлэр сылларга урукку тутуулары хаарбах дьиэ испииһэгэр киллэрэргэ докумуоннары,
анал экспертизаны ааһалларын тэрийиэхтээхтэр. Бүгүҥҥү күҥҥэ бөһүөлэккэ килиэп буспата биир сытыы
боппуруоска кубулуйбута кистэл буолбатах. Онон үүммүт сылга бэкээринэ үлэтин сөргүтэргэ биир бастакы
сорук буоларын бэлиэтээтилэр. Олохтоох бюджекка быйыл анал техника атыылаһыытыгар, бөһүөлэги
тупсарыыга 5 400 тыһ.солк көрүллүбүт.
Мунньаҕы баһылык Прокопий Семенович дьон олоҕун уйгута тупсарын туһугар нэһилиэнньэ бары
түмсэн, тэрилтэлэр, уопсастыбаннай түмсүүлэр, олохтоох депутаттар бары биир санаанан үлэлээтэхпитинэ
эрэ ситиһии кэлиэҕэ диэн түмүктээтэ. Отчуот сүнньүнэн мустубут дьон баһылык үлэтин сөптөөҕүнэн
сыаналаатылар.
«Муома оройуона» МТ пресс-сулууспата.
