Быйыл Арассыыйаҕа «Дьиэ кэргэн» сылынан биллэриллибитэ. Үлэни өрө туппут, үтүө холобур буолар дьиэ кэргэн аҕыйаҕа суох.
Улахан Чыыстай нэһилиэгэр таба иитиитинэн дьарыктанар, ураты олохтоох, бэйэлэрин төрүт үгэстэрин илдьэ сылдьар дьон түөлбэлээн олорор сирдэрэ буолар. Онтон биирдэстэрэ биллэр удьуор табаһыт, дэгиттэр уус, Үлэ Кыһыл Знамята орден кавалера Христофор Николаевич Дьячков кэргэнинээн Евдокия Максимовналыын олохторун таба иитиитигэр анаабыттара, оҕолорун, сиэннэрин табаһыт идэтигэр уһуйбуттара холобурга сылдьар.
Христофор Николаевич Дьячков 100 сылыгар аналлаах кинигэ бэчээттэнэн күн сирин көрдө. Кинигэни Алена Егоровна Корякина уонна Оксана Семеновна Громова хомуйан оҥордулар.
Кинигэҕэ хотугу дьон олоҕун-дьаһаҕын, дьарыгын, айылҕаҕа, тулалыыр эйгэҕэ тапталы хоһуйбут Христофор Николаевич эбээннии хоһоонноро, кэпсээннэрэ, ону тэҥэ кини дьиэ кэргэнин олоҕун, үлэтин — хамнаһын сырдатар ахтыылар, хаартыскалар киирбиттэр.
Кинигэ 6 түһүмэхтэн турар:
Бастакы түһүмэх Христофор Николаевич Дьячков олоҕун кэпсээнэ, иккис » Айылҕаны кытта алтыһан», үһүс «Олоҕун төрүт үгэстэригэр анаабыта», төрдүс «Быстыспат ситим», бэһис «Төрүт дьарык салҕанар», алтыс «Утум салҕанар».
Христофор Николаевич айылҕаттан бэриллибит ураты дьоҕурун, олоххо муударай көрүүтүн туһунан оҕолоро, алтыспыт доҕотторо, биир дойдулаахтара истиҥник санаан, махтанан суруйаллар.
Айталина Николаева
