Биһиги хаһыаппыт Үлэ сылыгар бэйэлэрин көрбөтөрбүт даҕаны, тустаах үлэлэрин чиэстээхтик толоро сылдьар үлэһит дьон туһунан билиһиннэрэр.
Оройуон киинигэр — Хонууга элбэх квартиралаах уопсай дьиэлэри ОДьКХ МУП тэрилтэтэ (директор Вячеслав Тихонов) хааччыйар.
Бу тэрилтэҕэ дворнигынан үтүө суобастаахтык Александр Шевелёв үлэлиир.
— Мин үлэм диэн Молодёжнай уонна Спортивнай микрооройуоннар уопсай дьиэлэрин тулатын ыраастык тутуу буолар. Дьиэлэр кирилиэстэрин уонна бөх тоҕор контейнердар тастарын ыраастыыбын.
Билигин үлэм элбээтэ. Дьиэлэр кирилиэстэрин хаардарын ыраастыыбын. Хаар түһэрин, кырдьыга, сөбүлээбэппин. Бу күннэргэ хаар сүрдээх хойуутук түстэ. Сарсыардаттан дьиэлэринэн сылдьан ыраастыыбын.
Ол эрэн саамай түбүктээх дьыл кэмэ, биллэн турар, саас. Ириэрии саҕаланнаҕына, туох баар бөхпүт барыта көстөн кэлэр. Ону кытта охсуһабын.
Аны контейнер аанын саппакка эрэн аһаҕас хааллардахтарына ыт-ынах ыһар. Урут ынахха өһүм суох этэ (күлэр). Билигин охсуһар охсуһуум — кинилэр. Бөҕү ыһалларын сөбүлээбэппин.
МУП-ка дворниктаабытым алта-сэттэ сыл буолла. Эһиил биэнсийэҕэ тахсабын. Онтон уурайарым да буолуо. Кэнники илиим олус ыалдьар буолла.
Микрооройуон олохтоохторугар ыраастык туттан олоруҥ диэхпин баҕарабын. Сорохтор бөхтөрүн үөһээ түннүгүнэн кыыратан ыыталлар, ону ыттар хайыта тыытан ыһаллар. Бөҕү контейнер иһигэр быраҕыллыахтаах уонна аанын лип саба сылдьар буоллахха, бөх ыһыллыбат ээ.
Александр Ильич ханнык уопсай дьиэ ыраастык туттан олорорун аахтара билэр. Саамай чэнчистик туттан олорор дьиэлэринэн Портовской переулокка турар урукку профилакторий уонна киин Молодёжнай уулусса уопсай дьиэтин ааттаата.
Коммунальнай хаһаайыстыба үлэһиттэрэ биһиги күннээҕи олохпут уйгутун уһансаллар диэтэххэ омун буолбатах. Биһиги сылаас, сырдык, ыраас эйгэҕэ олорорбут кинилэр үлэлэриттэн тутулуктаах.
Дьон үлэтин убаастыы үөрэниэххэ
