Сэтинньи 25 күнүгэр Муома орто оскуолата төрүттэммитэ 95 сылын бэлиэтээтэ. Бу бэлиэ күҥҥэ аналлаах нэдиэлэ үөрүүлээх линиэйкэнэн саҕаланна. Учууталларга, үөрэнээччилэргэ анаан Муома орто уонна алын сүһүөх оскуолаларын түмэллэрин салайааччылара Антонина Ильинична Никулина, Антонина Яковлевна Слепцова, МОО дириэктэрэ Василина Васильевна Тихонова эҕэрдэ тылларын эттилэр. Бу күн төрөппүттэр минньигэс торт астаан, оҕолору күндүлээтилэр, бырааһынньыктааҕы чүмэчи уота күндээрдэ, саала иһигэр мустубут бар дьон оскуола гимнин ырыатын күргүөмүнэн ыллаатылар.
Линиэйкэ кэннэ МОО-тын араас сылларга бүтэрбит ыалдьыттары ыҥыран кылаас чаастара буоллулар. Оҕолорго ыҥырыылаах ыалдьыттар оҕо саастарын кэмин ахтан-санаан аастылар, урукку устуоруйаны сырдаттылар.
Нэдиэлэ устата хас биирдии кылааска А.И.Никулина музейнай уруок ыытта. Манна оскуолабыт төрүттэниититтэн саҕалаан билиҥҥи кэм чахчылара кэпсэннэ, оҕолор төрөппүттэрин, учууталларын, чугас дьоннорун үөрэммит, үлэлээбит кэмнэрин биллилэр, бэйэлэрэ кинилэр тустарынан матырыйаал хомуйан түмэл пуондатын байыттылар. Хас биирдии кылаас олоҕун сырдатар планшеты оҥорон бэлэх ууннулар.
Учууталлар араас тиэмэнэн үөрүүлээх сэргэх аһаҕас уруоктары ыыттылар.
Чэппиэр күн Г.С.Попова-Санаайа 75 сааһыгар аналлаах “Дьиэ кэргэн – олох төрдө” диэн кэмпириэнсийэ үгүс төрөппүтү түмэн ыытылынна.
Күн аайы оҕолорго аналлаах “Ситис” оҕо тэрилтэтин тэрийиитинэн оонньуулар ыытылыннылар, оҕолор кэрэ көстүүлээх фотозоналарга хаартыскаҕа түстүлэр, араас таҥаһы кэтэн бырааһынньык тыыныгар киирдилэр.
Муома орто оскуолатын үбүлүөйдээх сэтинньитээҕи тэрээһинэ ахсынньы 5 күнүгэр оҕо-аймах кэнсиэринэн түмүктэниэҕэ.
Данилова Татьяна.