Муус устар 13-14 күннэригэр Хонууга А.В.Карпов аатынан оҕо спортивнай оскуолатын спортсаалыгар үгэскэ
кубулуйбут, “Хорсунун иһин” уордьан кавалера, сулууспаҕа сылдьан бэйэтин олоҕун толук уурбут полиция участковай боломуочунайа полиция капитана Бурцев Василий Васильевич сырдык кэриэһигэр остуол тенниһигэр күрэх 7-с төгүлүн үрдүк таһымнаахтык ыытылынна. Күрэх“Муома оройуона” муниципальнай тэриллии “Оскуола саастаах оҕолор, эдэр ыччат ортолоругар буруйу оҥорууну сэрэтии, нэһилиэнньэҕэ уопсастыбаннай бэрээдэги хааччыйыы митуонна буруйу оҥорууну бохсуу” тус муниципальнай бырагараамма чэрчитинэн үбүлэннэ уонна ИДЬМ Муоматааҕы отделенията(нач.полиция подполковнига Рожин С.С.), В.В. Бурцев огдообото Сергеева Айталы Алексеевна, аймахтара, доҕотторо өйөбүл буоллулар. Онон кинилэргэ бары теннисистэр ааттарыттан барҕа махтал тылларын этэбит.
Быйылгы күрэххэ оройуон бары күүстээх оонньооччулара бары кэриэтэ кытыннылар. Суол суоҕунан Төбүлэх
нэһилиэгин күүстээх оонньооччулара бу күрэххэ кыттыыны ылбатылар. Ол да буоллар көрөөччүлэр да тэрийээччилэр да теннис оонньуутутн таһыма олох таһыччы үрдээбитин бэлиэтээтилэр. Хардарыта күүстээх охсуулар, соһуччу быһа таһыйыылар, саталлаах көмүскэнии араас албастарын барытын бу күрэххэ көһүннэ. Оонньооччулар бары кэриэтэ профессиональнай ракетканан оонньууллара биллэн турар оонньуу таһымыгар биллэ көстөр. Бэлиэтээн эттэххэ, бу күрэххэ саҥа саҕалаан эрэр оскуола оҕолоро кыттаннар оонньуур таһымнара үрдээбитин бары бэлиэтии көрдүбүт. Бу оҕолор икки-үс сылынан пьедестал үктэллэригэр үтүрүйсэр оонньооччу буолууһуктар. Дьарыгы көтүппэккэ, сөптөөх оонньуур ракетка ылынан, куоракка буолар күрэхтэргэ, үөрэтэр-дьарыктыыр түмүүлэргэ кыттан истэхтэринэ дьоһун оонньооччу буолуохтара диэн сахалыы сиэринэн сэмээр эрэнэ күүтэбит.
Бастакы күн биирдиилээн бастыыр иһин күрэххэ эр дьоҥҥо 24 киһи, кэрэ аҥардарга 9 оонньооччу суруттаран
бэйэлэрин холоннулар. Кэрэ аҥардарга утарылаһааччыларын барыларын сабырыйан Новгородова Сардана
Владимировна (Муома алын сүһүөх оскуолатын учуутала) пьедестал үрдүкү үктэлигэр турда. Индигиртэн “Н.А.
Брызгалов аатынан орто оскуола” 11 кыл үөрэнээччитэ Диканцева Алина иккис, Тогмитова Алена Владимировна(Муома орто оскуолатын физкультура учуутала) үһүскэ таҕыстылар. Эр дьон түөрт бөлөххө арахсан
оонньоотулар. Балаһыанньа быһыытынан бөлөхтөн 3-лии күүстээх оонньооччу салгыы оонньуур быраабы ылар. Дьэ
манна кытаанах киирсиилэр буоллулар, соһуччу да түмүктэр бааллар. Ол гынан бары фавориттар салгыы
оонньоотулар. Күрэх кыайыылааҕынан Суон Тииттэн А.В.Карпов аатынан оҕо спортивнай оскуолатын тренерэ-
уһуйааччыта Слепцов Николай иккис-үһүс миэстэлэргэ Винокуров Айысхан(Аэропорты Севера), Индигиртэн
“Н.А.Брызгалов аатынан орто оскуола” 11 кыл үөрэнээччитэ Атласов Айдын туһааннааҕынан пьедестал үктэллэригэр турдулар.
Күрэх муҥутуур кыайыылааҕын быһаарар киирсиилэргэ эр дьоҥҥо 18, дьахталларга 10 оонньооччу бэйэлэрин
тургутуһан көрдүлэр. Дьэ манна сүрдээх тэтимнээх күүстээх оонньууну көрдөрөн, эр дьоҥҥо түмүк оонньууга
оскуолаҕа үөрэнэр сылларыттан бииргэ эрчиллэр, күрэхтэһэр Слепцов Николай уонна Винокуров Айысхан
оонньуулара күрэхтэһии киэргэтиитинэн буолла. Бу оонньууга 3:1 ахсаанынан доҕорун сабырыйан Николай күрэх
кыайыылааҕынан буолла уонна Бурцев В.В. доҕотторо туруорбут бириистэрин Куб – балаакка хаһаайынынан буолла.
Оттон кэрэ аҥардарга кыайыылааҕынан 2022 сыллааҕы бу күрэх кыайыылааҕа Индигиртэн Диканцева Алина кыайыы өрөгөйүн биллэ уонна Айталы Алексеевна Сергеева туруорбут робот-пылесоһунан наҕараадаланан үөрдэ. Быйылгы күрэх биир бэлиэ түгэнинэн кырачаан теннис оонньооччулар ортолоругар аччыгый финал оонньоммута буолла.
Бирииһи полиция отделын сотрудниктара туруордулар. Манна Николай Слепцов иитиллээччилэрэ Виола Дягилева
уонна Аделина Левченко оонньоотулар. Бу оонньууга Аделина 2:1 ахсаанынан сабырыйан “Учур” маҕаһыынтан анал
сертификат хаһаайынынан буолан үөрүүтэ-көтүүтэ үрдээтэ, оттон Виолаҕа эмиэ “Учур” маҕаһыынтан сертификат
туттарылынна. ИДЬМ Муоматааҕы отделениетын сотрудниктарын анал бириистэрин полиция оперуполномоченнайа Герасимов Иван ылла. Иван анаан дьарыктаннаҕына ханнык баҕарар ситиһиини ситиһэр кыахтаах оонньооччу буолуон сөп эбит. Онон барыта Ивантан эрэ тутулуктаах.
Кыттааччылар бэлиэтээбиттэринэн бу турнир сыл аайы үрдүк таһымнаахтык ыытыллара, тэрийээччилэр күүстээх
үлэни былааннаан ыыталларын туоһутунан буолар. Күрэх сабыллыытыгар ИДЬМ Муоматааҕы отделениетын
начальнига полиция подполковнига Рожин С.С. күрэх олус тыҥааһыннаахтык барбытын бэлиэтээн туран, ыҥырыыны ылынан манна кытта кэлбит оонньоочуларга Айталы Алексеевна Сергеева махтал тылларын тириэртэ уонна өссө да бу күрэх ыытыллыа диэн эрэннэрдэ.
Ити курдук остуол тенниһин сытыы киирсиилэрэ өссө да салгыы буолуохтара, аныгыскы күрэххэ көрсүөххэ дылы
диэн оонньооччулар тарҕастылар.
Чөл туруктаах буолуҥ, спордунан дьарыктаныҥ.
А.В. Слепцов,
күрэх кылаабынай судьуйата