Бу күннэргэ Муома оройуонугар Саха Республикатын тыатын хаһаайыстыбатын миниистирин солбуйааччы П.Р. Николаев таба ыстаадаларынан үлэлээтэ. Прокопий Романович хас да табаны иитэр аҕа ууһунан общиналарга сылдьан үлэни-хамнаһы билистэ, олох-дьаһах тэрээһинин көрдө. Кэнники кэмҥэ табаһыттар олорор-үлэлиир усулуобуйалара тупсубутун бэлиэтээтэ.
Хаһаайыстыбаларга көрдөрүү да үрдээбитэ инники соруктары быһаарыыга төһүү күүс буолуохтарын санатта. Муома табаларын ыстаадаларыгар сайдыыны атахтыыр торумунан бруцелез ыарыыта буолар. Бу ыарыыны эмтиир дьаһаллар ветеринарнай сулууспа кэмигэр ыытар үлэлэриттэн быһаччы тутулуктааҕынан Сааһыырдааҕы ветучаастак тустаах үлэһиттэринэн хааччыллыбата болҕомтоҕо ылыллыбыт. Уопсайынан оройуоннааҕы ветуправление бытарытыллан Чурапчытааҕы ветеринарнай управлениеҕа филиал быһыытынан сыһыарыллыбыта Муома оройуонун тыатын хаһаайыстыбатыгар улахан ночооту оҥорбута мэлдьэһиллибэт. Солбуйааччы миниистири кытта көрсүһүүгэ тустаах управление үлэтэ урукку штаттара эргитиллэн оройуоҥҥа сөргүтүллэрэ туруорсулунна. Оройуоммутугар тыа хаһаайыстыбатынан дьарыктанар биирдиилээн хаһаайыстыбалар баар проблемалары тус министерство дьүүлүгэр таһаардылар. Ол курдук оройуон саамай уопуттаах сылгыһыта П.В.Корякин чааһынай сылгы иитэр хаһаайыстыбаларга государствоттан өйөбүл суоҕун ыйда, бэйэлэрин табаларын көрөр, чааһынай сүөһүлэрин ииттэр хаһаайыстыбаларга көмө күүскэ тиэрдиллэ турар кэмигэр маннык балаһыанньа өйдөммөт диир Петр Васильевич. Муома нэһилиэгэр 100тэн тахса сылгы бэйэ бас билиитигэр баара хаһаайыттар эрэ кыахтарынан иитиллэн тураллар эбит. Манна саатар күрүө-хаһаа тутуутугар өйөбүл баара буоллар төһүү күүс буолуо этэ диир кырдьаҕас сылгыһыт. Кырдьыга да Хонуулар иитэр табабыт суох, ынах сүөһү ахсаана тарбаҕынан ааҕыллар кэмигэр сылгыһыттар интэриэстэрин болҕомтоҕо уурарбыт уолдьаста. Ынах сүөһүтүн иитиитинэн дьарыктанар А.И. Ильина ыанар сүөһүм ахсаанын элбэтиэхпин от тиийбэт кыһалҕатыттан сыл аайы идэһэҕэ ыытабын диир.
Быйыл ходуһалара ууга баран үүнүүлээх сылга ото кырыымчыктык бэлэмнэниллибитин бэлиэтээн туран тэрилтэлэр ыытар субуотунньуктара кини хаһаайыстыбатыгар олус наадалааҕын ыйда. Кырдьыга да инникитин эдэр ыалларга саатар кэбиһиигэ эбии үлэһит көмө наадатын учуоттуохха. Нэһилиэнньэни үрүҥ аһынан хааччыйар хаһаайыстыба быста аҕыйаабыт кэмигэр. Салгыы Анна Иннокентьевна оройуоҥҥа комбикорм, эбиэс сылы быһа атыыга баар буоларын туруоруста. Атын оройуоннар опыттарыгар олоҕуран сүөһү тустаах аһылыгын оптовай эргиэн атыылыан сөптөөҕүн ыйда. Ыытыллыбыт көрсүһүүгэ киирбит туруорсуулары солбуйааччы миниистир сурунан барда, Арктика тыйыс усулуобуйатыгар тыа хаһаайыстыбатын дьарыктанар дьоҥҥо туох кыалларынан көмө тиэрдиллиэҕин эрэннэрдэ. Инникитин да тыа хаһаайыстыбатын министерствотын салайааччылара маннык миэстэтигэр сылдьан үлэ хаамыытын билсэллэрэ туһаалаах эрэ буолуо.
Х.Кривошапкина