Киэн туттар биир дойдулаахпыт, поэт, журналист Т. Е. Черёмкин-Толомон сэтинньи 11 күнүгэр 82 сааһын бэлиэтээн Соболоох орто оскуолатыгар быйыл иккис төгүл “Толомон ааҕыылара” үөрэнээччилэри, учууталлары, төрөппүттэри, поэзияны сэҥээрээччилэри түмтэ. Тэрээһини библиотекарь Анна Михайловна Стручкова иилээн-саҕалаан ыытта. Барыта 17 оҕо кытынна. Дьүүллүүр сүбэҕэ оскуола дириэктэрэ Раиса Егоровна Старкова, саха тылын учуутала Александра Гаврильевна Старкова, нуучча тылын учуутала Антонина Михайловна Слепцова үлэлээтилэр. Түмүккэ I миэстэ – «Төрөөбүт буор» хоһоону аахпыт IV кылаас үөрэнээччитэ Черова Айыллаана, II миэстэ – Шкулёв Артём, «Ийэҕэ махтал» хоһоон, III миэстэ – Хабаров Алёша, «Ыйдаҥа түүн» хоһоон. Биһирэбил сурук III кылаас үөрэнээччилэригэр Новгородова Кираҕа, Уваровская Людаҕа «Куораттар – хайалар” хоһоону олус иһирэхтик аахпыттарын иһин ананна.
“Толомон ааҕыылара” күрэҕи Тихон Егорович Черёмкин-Толомон аатын үйэтитэн, оҕолорбут үүнэр ыччаппыт биллиннэр-сэргээтиннэр диэн эһиил оройуон бары оскуолаларын түмэн ыытыллыаҕа.
Лена Гоголева.
