Төрөөбүт тыл уонна сахалыы сурук-бичик күнүгэр аналлаах Муома орто оскуолатыгар үгэс быһыытынан ыытыллар тэрээһиннэр нэдиэлэ устата сэргэхтик ыытылыннылар.
Ол курдук, бары кылаастарга тыл сайдыытын устуоруйатын туһунан кылаас салайааччылара анал чааска кэпсээтилэр.
Бэлиэ күҥҥэ уоскулаҥ кэмигэр «Ситис» оҕолоро сахалыы оонньуулары үөрэнээччилэргэ оонньоттулар, остолобуой үлэһиттэрэ арыылаах алаадьынан күндүлээтилэр, бу күн оскуола оҕолоро сахалыы таҥнан-симэнэн кэлэн норуот үөрүүлээх күнүн бигэргэттилэр.
Саха методическай түмсүүтүн учууталлара төрөппүттэргэ уонна оҕолорго анаан иккис сылын ыытыллар «Өркөн өй» өй-билии оонньуутун тэрийэн ыытта. Саха тылыгар, литэрэтиирэҕэ, култуураҕа, устуоруйаҕа уонна оскуолабыт 95 сааһыгар аналлаах ыйытыылар кэлбит дьон интэриэһин тарта, билиилэрин дириҥэттэ. Бары билбэтэхпитин биллибит, эһиил өссө кэлиэхпит диэн оонньууттан астынан, дуоһуйан тарҕастылар.
Сылын аайы ыытыллар оройуоннааҕы «Аман өс» тыл-өс, куолу күрэҕэ МОО аактабай саалатыгар түөрт оскуола оҕолорун түмтэ: Орто Дойду, Соболоох, Индигир, Муома. Кэлбит ыалдьыттары 7 «А» кылаас үөрэнээччилэрэ алгыстаах алаадьынан көрүстүлэр. Бар дьоҥҥо 7 «Б» кылаас кыргыттара сиэр-туом үҥкүүтүн көрдөрөн, боҕуруускай отунан ыраастаатылар. Муома орто оскуолатын тоҕус туруйа уолаттара төрүт тыл дорҕоонун иҥэрэр хомуһуннаах хоһоону аахтылар. Үөрэҕирии управлениетын начальнигар А.А. Крупышева эҕэрдэ тылын кэннэ долгутуулаах күрэх саҕаланна.
Үөрэнээччилэр икки бөлөҕүнэн (5-7, 8-11 кылаас) арахсан икки түһүмэҕинэн тургутууну аастылар. «Тыл-өс, куолу» күрэҕэр оҕолор талбыт тиэмэлэрин арыйан дьүүллүүр сүбэҕэ бэйэлэрин санааларын сырдаттылар. «Тылбаас» күрэҕэр тылы, этиини нууччалыы-сахалыы тылбаастаатылар.
Түмүккэ хомоҕой тыллаах бастыҥ оҕолор бириистээх миэстэҕэ тигистилэр Муома орто оскуолатын дириэктэрэ В. В. Тихонова добун суруктары, бириэмийэлэри үөрүүлээх быһыыга туттарда.
Тэрээһин оройуоннааҕы үөрэҕирии управлениетын үбүлээһининэн, Муома орто оскуолатын салалтатын өйөбүлүнэн ыытылынна.
САХА БУОЛАН САНДААРЫҤ, КИҺИ БУОЛАН КИЛБЭЙИҤ!