Сыл түмүгүнэн тэрилтэлэринэн бастыҥ үлэһити талан чиэстээһин быйыл иккис сылын ыытылынна. Бу үлэһит киһиэхэ
болҕомто уурар үтүө тэрээһин оройуон аҕа баһылыгын Дмитрий Аммосов тус этиитинэн олоххо киирбитэ. Бастыҥ
үлэһиттэргэ анал бириэмийэни оройуон дьаһалтата үбүлүүр. Ол курдук, тохсунньу 5 күнүгэр «Осикат» сынньалаҥ киинигэр
ааспыт 2023 сылга үлэҕэ бастыҥ көрдөрүүлээх үлэһиттэри чиэстээһин дьоро киэһэтэ ыытылынна. Сыл бастыҥнарын
быһаарыы тэрилтэлэринэн сүүмэрдэммитэ. Тустаах
тэрийэр хамыыһыйаҕа
киирбит сайаапкалар бары өттүнэн учуоттанан анал номинациялар кыайыылаахтара бигэргэтиллибиттэрэ. Ол түмүгүнэн
16 хайысханан бастыҥ үлэһит уонна 2023 сыл муҥутуур бастыҥ үтүө киһитэ ааттара ааттанна. Биһиги оройуоммутугар
социальнай үлэһиттэр нэһилиэнньэ кыаммат араҥатыгар ас атыылаһан, дьиэ-уот үлэтин араас кыһалҕаларын быһааран
дьон сэҥээриитин ылбыттара уонтан тахса сыл буолла. Кинилэр ортолоругар соҕотох эр киһи күннэтэ тустаах дьонун
туһугар сүүрэр-көтөр, ис сүрэҕиттэн кырдьаҕастарын кыһалҕаларын чэпчэтэ сатыыр. Социальнай сулууспа 2023 сылга
бастыҥ үлэһит аатын Соболоох нэһилиэгэр үлэлиир Николай Корякиҥҥа мэктиэлээтэ. Биһиги оройуоммут республикаҕа
хотугу многоборье көрүҥнэригэр биир бастыҥ көрдөрүүлээх. Муома оҕолоро спорт бу көрүҥэр чемпион буолан дойдуларын
аатырдаллар. Онон эбии үөрэхтээһин бастыҥ үлэһитэ ааты оҕо спортивнай оскуолатын тренерэ Михаил Тарков ылбытын
көрөөччүлэр ытыс тыаһынан эҕэрдэлээтилэр.Транспорт сулууспатын бастыҥ үлэһитэ ааты «Арктика суоллара» КТ
Муоматааҕы учаастагын машиниһа, кэскиллээх эдэр үлэһит Николай Соловьев ылла. Ааспыт сылга оройуоннааҕы музей
анал Грант кыайыылааҕынан буолбута, маны таһынан бу тэрилтэ республикаҕа биир бастыҥ үлэлээҕинэн билиниллэн
араас таһымнаах тэрээһиннэргэ үлэтин опытын үллэстибитэ. Онон музей директора Алена Корякина культура салаатын
бастыҥ үлэһитэ ааты дьоһуннаахтык сүктэ. Оттук-уматык хааччыйыытын бастыҥ үлэһитэ ааты Афанасий Вожжов,
Хонуутааҕы нефть ыскылаатын оператора ылла. Кини тус үлэтин таһынан тэрилтэтин аатын спортивнай күрэхтэргэ
чиэстээхтик көмүскүүр, бары ыытыллар тэрээһиннэргэ көхтөөхтүк кыттар. Оройуоҥҥа ыытыллар культурнай тэрээһиннэргэ
Чыбааҕылаах нэһилиэгин аатын дьоһуннаахтык ааттатар, көрөөччүлэри үҥкүү алыптаах хамсаныыларынан үөрдэр
«Кэскил» уһуйаан иитээччитэ Мария Рожина оскуолаҕа киириэн иннинээҕи саастаах оҕолор бастыҥ уһуйааччылара ааты
ылыан ылла. Кини ааспыт сылга бэйэтин биир идэлээхтэригэр күрэххэ бастаан турардаах. Доруобуйа харыстабылын
бастыҥ үлэһитэ ааты Туйаа-
ра Михеева, оройуоннааҕы киин балыыһа кылаабынай сиэстэрэтэ ылла. Бастыҥ урбаанньыт аатын Хонууга килиэп
буһарыытын уустук үлэтин саҕалаабыт эдэр урбаанньыт Абукар Степанов ылла. Абукар биһиги бары улаханнык
убаастыыр салайааччыбыт, Муомаҕа үйэ аҥаарыттан ордук кэмҥэ олорон оройуон экономическай сайдыытыгар дьоһун
кылааты киллэрбит Абукар Хамзатович Муталиев сиэнэ буолар. Эдэр киһи эһэтэ саҕалаабыт үлэтин салҕаан килиэп
буһарыытын сайыннарарга туруммута биһигини олус үөрдэр. «Сыл бастыҥ киһитэ» бириэмийэни туттарыы церемониятыгар
кыайан кэлбэтэх номинаннар туоһу суруктарын, харчынан бириэмийэлэрин төрөппүттэрэ, бииргэ үлэлиир дьонноро,
тустаах нэһилиэк бэрэстэбиитэллэрэ ыллылар. Ол курдук, «Сыл бастыҥ учуутала» номинацияҕа Улахан Чыыстай орто
оскуолатын учуутала Елизавета Тарабукина тигистэ. Тыа хаһаайыстыбатын бастыҥ үлэһитинэн Худи Харючи аатынан
родовой община табаһыта Иван Громов ааттанна. «Бастыҥ энергетик» аатын оройуоннааҕы электростанцияттан смена
салайааччыта Иннокентий Саввин ылла. Коммунальнай хаһаайыстыба салаатын бастыҥ үлэһитинэн ОДьКХ ГУТ Чуумпу
Кытыллааҕы филиалын маастара Степан Гуляев буолла. «Экологическай уонна баһаартан сэрэхтээх буолуу салаатын
бастыҥ үлэһитэ» ааты баһаарынай чаастан караул салайааччыта Алексей Громов сүктэ. Оройуон бастыҥ спортсменынан
кэскиллээх тустуук Артем Слепцов ааттанна. Федеральнай структуралар бастыҥ үлэһиттэринэн суол куттала суох
буолуутун хааччыйар инспекция салайааччыта Евгений Нестеров буолла. Олохтоох бэйэни салайыныы бастыҥ
үлэһитинэн Төбүлэх нэһилиэгин дьаһалтатын баһылыгын солбуйааччы Евгения Николаева ааттанна. Ааспыт 2023 сыл
бастыҥ киһитин дьоһун аатын баһаарынай чаас Сааһыырдааҕы салаатын караул салайааччыта, билигин Саха сирин
Донецкайга баар тирэх пуунун сэбиэдиссэйэ Прокопий Романович Соркомов сүктэ. Муомалар анал байыаннай дьайыыга
сылдьар уолаттарыгар өйөбүл оҥорор, кинилэр кыһалҕаларын быһаарсар тустаах үлэһит ыытар тэрээһиннэрин үрдүктүк
сыаналаатылар, махталларын тиэртилэр. Бу дьоро киэһэ үлэ геройдарын уруйдаан бастыҥ ырыаһыттарбыт истиҥ-иһирэх
ырыа бэлэхтээтилэр. Дьон-сэргэ тустаах тэрээһини сэргээн күө-дьаа тарҕастылар. Инникитин да үлэ дьонун чиэстээһин
ыытылла турдун.
Х. Кривошапкина
