Оробуочай бөлөх Төбүлэхтэн салгыы Соболооххо кэлэн үлэлээтэ.
Бөлөҕү Муома оройуонун куратора Альбина Трубина салайан илдьэ сырытта. Бөлөххө инновация Министиэристибэтин отделын салайааччыта Дмитрий Васильев, суол сулууспатын Департаменын салайааччытын солбуйааччы Софья Кузьмина, СӨ тыатын хаһаайыстыбатын уонна ас-үөл бэлиитикэтин миниистирин солбуйааччы Прокопий Николаев уонна оройуон салайааччылара — оройуон дьаһалтатын баһылыгын бастакы солбуйааччы Артур Тарабукин, ОДьКХ Муоматааҕы филиалын дириэктэрэ Владислав Корякин, социальнай харысхал салайааччыта Антонина Щелканова уонна үөрэҕирии управлениетын начальнига Айталина Крупышева бааллар.
Соболоох. Манна 186 киһи олорор. 26 ыал кэтэх хаһаайыстыбалаах. Төбөнөн 60 ынах сүөһү, онтон 25-һэ ыанар ынах. 116 төбө сылгыттан биэтэ 48. Ону таһынан ыалларга 160 куурусса баар.
Отчуот иннинэ приёмҥа алта киһи суруйтаран тустаах салайааччылары кытта сирэй көрсөн бэйэлэрин кыһалҕаларын быһаарыыга туох-ханнык суоллары тобулар туһунан кэпсэттилэр. Бу киин сиртэн ыраах олорор дьоҥҥо олус сөптөөх дьаһал. Ыраах хоту дойду олохтоохторо бэйэлэринэн кэлбит дьоҥҥо санааларын аһаҕастык тиэрдэллэр, кыһалҕаларын быһаартараллар. Даҕатан эттэххэ, оробуочай бөлөх быйылгы сырыытыгар салайааччылары кытта тус приёмҥа үгүс киһи сылдьыбыта бэлиэтэннэ.
Отчуот үөрүүлээх түгэнтэн саҕаланна. Үүммүт сылга соболоохтор эбиллэн олороллор. Ол курдук Альбина Трубина нэһилиэк саҥа кырачаан олохтооҕо — быйылгы сыл маҥнайгы оҕотунан эҕэрдэлээн туран, «Дети столетия» сэртипикээти эдэр ийэ Вера Уваровскаяҕа үөрүүлээх быһыыга-майгыга туттарда.
Ону таһынан олохтоох оскуола учуутала Николай Слепцов өр сыллаах үтүө суобастаах үлэтин иһин СӨ үөрэҕириитин Министиэристибэтин Бочуотунай Грамотатынан наҕараадаланна.
Нэһилиэнньэ иннигэр отчуоту Үлэ уонна социальнай сайдыы миниистирин бастакы солбуйааччы Альбина Трубина туруорда. Олохтоохтор өрөспүүбүлүкэҕэ сыл устата туох үлэ-хамнас, сайдыы барбытын сэҥээрэн иһиттилэр. Ол кэннэ көхтөөхтүк бэйэлэрин ыйытыыларын биэрдилэр, санааларын үллэһиннилэр. Эмиэ атын нэһилиэктэргэ курдук соболоохтор бэтэринээрнэй учаастак Чурапчыга бэриллиэҕиттэн бу салааҕа үлэ мөлтөөбүтүн этиннилэр. Арктическай улууска олорорбут быһыытынан эр дьон биэнсийэҕэ тахсар саастарын кыччыырын туруорустулар. Интернет мөлтөҕө ыйылынна. Ааспыт үйэҕэ тутуллубут оскуола дьиэтэ эргэрэн саҥа оскуола тутуутун туруорустулар. Төһө да субсидированнай билиэт атыыга тахсарын иһин арктическай улууска ону өссө элбэтиннэрэр баҕалаахтар.
Нэһилиэккэ уот оройуонтан кэлэр буолан, уот сотору сотору барар-кэлэр, онон сибээстээн туспа электростанция туруорустулар. Ону таһынан почта уонна балыыһа дьиэтэ аварийнай туруктаммытын эттилэр.
Бырабыыталыстыба үлэтин тула кэпсэтии сыл ахсын сытыырхайан, кэҥээн иһэрэ нэһилиэнньэ көҕүн, наадатын сатаан туруорсары баһылаабытын көрдөрөр.
Отчуот түмүгүнэн Соболоох нэһилиэгин олохтоохторо СӨ бырабыыталыстыбатын үлэтин сөптөөҕүнэн сыаналаатылар.