Ааспыт сылга үөрүү көтөллөөх Муома оройуонун устуоруйатыгар киирэр, хотугу усулуобуйаҕа тэҥэ суох аныгылыы таҥыллыбыт улахан балыыһа комплекса олоххо киирбитэ. Олохтоохтор уонунан сылларга ыра санаалара туолан, бары таһымнаах былаас уорганнарыгар махталлара муҥура суох. Балыыһа үс этээстээх, саҥа технология аныгы киэбинэн таҥыллыбыт тэриллэринэн хааччыллыбыта. Ол эрээри, үлэлииргэ бэртээхэй усулуобуйалаах балыыһа анал идэлээх испэсэлиистэрэ, идэлээх быраастара олох аҕыйах.
Нэһилиэнньэ кыра да эчэйиини ыллаҕына, куоракка санрейсинэн тиийэн көмөнү ылар кыһалҕалаахтар. Акушер-гинеколог, хирург, анестезиолог, узист быраастар суохтар. Оҕо бырааһа өр кэмҥэ суох этэ. Ону таһынан олохтоохтору инбэлииттэргэ эмтэринэн кэмигэр хааччылыы суоҕа долгутар. Үксүлэрэ ыарахан сыаналаах эмтэри бэйэлэрин кыахтарынан ылыналлар.
Маны таһынан соболоохтор өртөөһүнү хаһан быһааралларын, сүөһүнү страховкалааһына, бэйдиэ ыттары уодьуганныырга, үөрэхтээһиҥҥэ, Арктика олохтоохторугар тутуу матырыйааллары аҕалтарыыга, уо.д.а. боппуруостары таарыйдылар.
Ситэриилээх былаас отчуотун иккис оробуочай бөлөҕүн салайааччыта СӨ Үлэҕэ уонна социальнай сайдыыга миниистири солбуйааччыта, оройуон куратора Альбина Трубина, СӨ тыатын хаһаайыстыбатын уонна ас-үөл политикатын министиэристибэтин хотугу үгэс буолбут салааларын отделын салайааччыта Иннокентий Баланов, СӨ доруобуйа харыстабылын министиэристибэтин иһинэн суһал көмөнү тэрийэр Департаменын салайааччыта Дьулустан Чичахов киирбит ыйытыыларга сөптөөх, нэһилиэнньэни астыннарар толору эппиэттэри биэрдилэр.