Бу күннэргэ оройуон үлэтин отчуота салҕанан барар. Олунньу 12 күнүгэр оройуон баһылыга Дмитрий Аммосов салайар бөлөҕө Соболооххо үлэлээтэ.
Отчуот иннинэ баһылык нэһилиэк актыыбын кытта көрүстэ. Соболоох нэһилиэгэ оройуон кииниттэн биир чугас сытар нэһилиэгэ. Бары тэрилтэлэр туруктара үчүгэйинэн сыаналанар. Ааспыт сайын оскуола спортивнай саалатыгар хапытаалынай өрөмүөн үлэтэ ыытыллыбытын түмүгэр биллэ сылыйбыт, ол эрээри үлэҕэ кыра итэҕэстэр бааллара бэлиэтэннэ. Аны оскуола бэйэтэ өрөмүөнү ааһыахтаах, бары ирдэнэр докумуоннара бэлэмнэр. Киэһэ олохтоох кулуупка нэһилиэнньэ саалаҕа толору мустан оройуон ааспыт сыллааҕы үлэтин слайдаларынан улахан экраҥҥа сэргии көрдүлэр-иһиттилэр.
Дмитрий Викторович Соболоох учаастагар “Тихон” сиригэр баар таас чох хостонон туһаҕа тахсарыгар киэҥ кэпсэтии барарыгар, үбэ-харчыта быһаарылларыгар тохтоото: “Сири туһаҕа таһаарарга бары өттүнэн толкуйдуур кэм кэллэ. Ол диэкинэн Кээликис суолун үлэлэтэргэ турунуохха наада. Салгыы ол суолунан оптоволокно сибээһэ Өймөкөөнтөн Соболооҕунан оройуон киинигэр тардылларын курдук кэпсэтии барар. Сотору оройуоҥҥа СӨ салалтата кэлэрин кэтэһэбит, былааннарбытын олоххо киллэрдэрбит диэн санаалаахпыт».
Соболоох олохтоохторо отчуоту дьүүллэһиигэ сүөһү ахсаанын лаппа кыччаабытын кэпсээтилэр. Ол сүрүн төрүөтүнэн сааскы өртөөһүн тэриллибэтэ, ходуһалар кураанныыллара, от хаачыстыбата тустаах ирдэбилгэ эппиэттээбэтэ буоларын ыйдылар.Сүөһү ииттэр дьон кыһын ортото ото суох хаалан эрэллэрин эттилэр. Ону таһынан олохтоох бородууксуйаҕа сыана быһыллыыта хааччахтамматын суотугар таба этэ 800 солкуобайга тиийэ улаатарыттан муҥатыйдылар. Манна тыа хаһаайыстыбатын управлениетын специалиһа Лаврентий Гуляев сүөһү аһылыгын аҕалыыга айан ороскуотун толуйуохтарын сөбүгэр тохтоото. Таба иитиитин салаатыгар өрөспүүбүлүкэ, оройуон таһымыгар сөптөөх көмө көрүллэр, таба этин сыанатын улаатыннаралларыгар төрүөт суох диэтэ. Сотору кэминэн Уус Дьааҥыттан киилэтэ 500 солк. сыанаҕа дьиэ табатын этэ кэлиэхтээх, сайаапкалары күүтэбит. Иһитиннэриигэ эбэн Дмитрий Аммосов СӨ тыатын хаһаайыстыбатын министиэристибэтин саҥа салалтатын кытта барыллаан кэпсэтиигэ оройуоҥҥа саха ынаҕын ииттиэн, тэнитиэн баҕалаахтарга босхону үрдүнэн Эбээн Бытантай улууһуттан саха боруодатын сүөһүтүн аҕалан түҥэтиэххэ сөбүн кэпсэппиттэрин эттэ. Сайаапкалары күүтэбит диэтэ. Соболоохтор биир сүрүн кыһалҕаларынан Индигирская уулуссаҕа 10-ча ыал мөлтөх күүрүүлээх уот ситимигэр холбонон олороллоро буолбут. Биир ыал тэлгэһэтигэр эмэҕирэн түһээри турар уот остуолбата кутталы үөскэтэр эбит. Бу кыһалҕаны туоратар инниттэн нэһилиэк тустаах тэрилтэҕэ сайаапка биэрэрэ сүбэлэннэ. Уонча сыллааҕыта 8 квартиралаазх уопсай дьиэ үөрүлээх быһыыга-майгыга олоххо киирбитин сырдаппыппыт. Ол дьиэбитигэр күн бүгүнүгэр диэри көрүдүөрүгэр ититэр ситим тардыллыбатаҕын туһунан дьиэ олохтоохторо этиилэригэр бу боппуруос үүммүт сылы ааспакка быһаарыллыаҕын, дьиэ докумуона ситэриллэн чуолкайдаммытын нэһилиэк баһылыга Эрик Павлов чопчулаата.
Түмүккэ, Дмитрий Аммосов оройуон сайдыытыгар сэмэй кылааттарын иһин Гаврил Степановка, Эжана Березкинаҕа оройуон дьаһалтатын Грамотатын, анал чаһылары туттарда. Ону тэҥэ оскуола бастыҥ үөрэнээччилэрэ саҥа дьыллааҕы бэлэхтэри тутан үөрдүлэр.
«Муома оройуона»МТ пресс-сулууспата.