Соболоох орто оскуолатыгар үөрэх дьыла саҕаланна.
Быйыл маҥнайгы кылааска 1 уол оҕо киирдэ. Кинини билии сырдык аартыгар Саха Өрөспүүбүлүкэтин үөрэхтээһинин туйгуна, үрдүк категориялаах учуутал Ульяна Васильевна Старкова сирдээн үөрэтэр.
Билии күнүгэр бары үлэһиттэри, үөрэнээччилэри дириэктэр эбээһинэһин толорооччу Ирина Эдуардовна Сизых итиитик-истиҥник эҕэрдэлээтэ. Оҕолорго туйгуннук үөрэнэргэ, иитэр-үөрэтэр үлэһиттэргэ айымньылаах үлэни баҕарда.
Биһиги оскуолабытыгар, үгэс быһыытынан, бэтэрээн учууталларбыт ытык ыалдьыт буоллулар. Ол курдук Российскай Федерация уопсай үөрэхтээһинин туйгуна, Саха Өрөспүүбүлүкэтин үөрэхтээһинин туйгуна, Учууталлар учууталлара Ульяна Ивановна Гореева уонна Российскай Федерация уопсай үөрэхтээһинин туйгуна, Саха Өрөспүүбүлүкэтин үөрэхтээһинин туйгуна, «Дети Саха Азии» оонньуу стипендиата Мария Афанасьевна Слепцова эҕэрдэ тыл эттилэр. Кинилэр оҕолору кытта «Самолетик будущего» диэн үһүс сылын «Навигаторы детства» хамсааһын ыытар үгэһигэр кыттыыны ыллылар.
Быйыл биһиэхэ саҥа биология уонна химия учуутала Анастасия Петровна Хабарова үлэлии кэллэ.
Оскуолабыт быйылгы выпускниктара 100% үөрэххэ киирдилэр. Ол курдук Сандаара Леонтьева — Дьокуускайдааҕы медицинскэй колледжка медсестра идэтигэр, Регина Соркомова — Намнааҕы педколледжка дошкольнай отделениеҕа, Артур Шкулев — ХИФУ иһинэн үлэлиир Инфраструктурнай колледжка программист идэтигэр киирдилэр. 9-с кылаас кэннэ Чаҕыл Федоров Нерюнгри куорат медицинскэй колледжын устудьуона буолла.
Саҥа үөрэх дьылыгар Муома оро-йуонун дьонугар айымньылаах үлэни, элбэх ситиһиини, доруобуйаны, дьолу баҕарабыт.
Соболоох сонуна
