Сарсыарда Смоленскай куораттан үөрүүлээх сонун тигинээн кэллэ. Муоматааҕы спортивнай оскуола тренерэ, норуоттар икки ардыларынааҕы кылаастаах аан дойду хас да төгүллээх чемпиона СЕМЕН СОРКОМОВ ыам ыйын 28 — 31 күннэригэр Смоленскайга «үбүлүөйдээх» спорт дыбарыаһыгар Россия көҥүл уонна греко- Римскэй тустууга маастардарын ортолоругар аһаҕас чемпионакка Арассыйатааҕы тустуу түһүлгэтигэр бэйэтин ыйааһыныгар кыайыыны ситистэ.
Семен Прокопьевич “50-55 саастарыгар диэри бөлөххө 62 киилэҕэ туһуннум, — диэн кэпсиир. – Бастакы эргииргэ сайаапкаламмыт киһи кэлбэккэ, кыайыыны тута биэрбиттэрэ. Иккис эргииргэ тувин бөҕөһүн 17:5 хоппутум, онтон финалга дагестанец бөҕөһүн 10:8 кыайбытым. Саха сириттэн 14 саха бэтэрээн тустууктара кытыннылар, итинтэн 6 бөҕөс кыһыл көмүс мэтээллэннибит. Тус бэйэм ааппыттан оройуон Аҕа баһылыгын солбуйааччытыгар Артур Тарабукиҥҥа, үлэлиир колектвипар барҕа махталбын тиэрдэбин”.
Турнирга Россияны, СНГ уонна Дальнай Восток дойдуларын киллэрэн туран, араас дойдуттан кэлбит спортсменнар кыттыыны ылбыттар. Кыттааччылар ортолоругар аан дойду, Европа уонна Россия чемпионнара, ону тэҥэ аан дойду ветераннарын чемпионаттарын хас да төгүллээх кыайыылаахтар уонна призердар бааллар. Көҥүл тустууга бэтэрээннэргэ өссө биир кыайыытынан Семен Соркомовы истиҥник эҕэрдэлиибит!