Ахсынньы 15 күнүгэр Индигирдээҕи норуот айымньытын дьиэтэ уонна Индигир нэһилиэгин бэтэрээннэрин сэбиэтэ
«Санаа сааһырбат, дууһа кырдьыбат» диэн ырыаҕа, үҥкүүгэ, сыаҥкаҕа оройуон бэтэрээннэригэр күрэһи тэрийэн ыытта.
Күрэс сүрүн сыалынан өбүгэ үгэһин, Муома оройуонун сэрии, тыыл, үлэ бэтэрээннэрин туһунан кэнчээри ыччакка
билиһиннэрии, сырдатыы, оройуон бэтэрээннэрин түмсүүлэрин үлэлэрин тарҕатыы, «Дууһа долгуйар, санаа
сылаанньыйар» санаанан салайтаран, уопсастыбаннай олоххо көҕүлээһин, өйөөһүн буолар. Күрэскэ Орто Дойду, Хонуу,
Соболоох, Индигир нэһилиэктэрин бэтэрээннэрин түмсүүлэрэ кытыннылар.
Бу күрэс аан бастаан Хонууга, «Арчы» дьиэтин Далбар Хотуна Ирина Николаевна Слепцова бырайыагынан
ыытыллыбыта. Манна кыайыылааҕынан «Талба» Индигирдээҕи бэтэрээннэр түмсүүлэрэ буолбута. Күрэс хамсык ыарыыта
мэһэйдээн тохтуу сылдьыбыта. Быйыл үгэһи салҕаан, Индигир нэһилиэгин бэтэрээннэрэ бэрт сэргэх күрэһи ыыттылар.
Бастаан кэлбит ыалдьыттары итии чэйдээх, толору астаах сандалыга олордон күндүлээтилэр. Бэтэрээннэр оскуолаҕа
баран түмэли көрөн, астынан кэллилэр. Истиҥ кэпсэтии, көрсүһүү буолла. Биир кэрэхсэбиллээҕинэн Муома оройуонун
араас кэмнэргэ үлэлээбит үтүө үлэһит дьонун мэтириэттэрин уруһуйунан, кумааҕынан кырыйан оҥоһуллубут быыстапката
дьон сэҥээриитин, интэриэһин тарта. Кэлбит дьон сөҕө-махтайа көрдүлэр.
Салгыы «Мин ырыа кэһиилээх кэлиэҕим» ырыа күрэҕэр Орто Дойдуттан «Алгыс» бэтэрээннэрэ кыайыылаах буоллулар.
«Кэрэни кэрэхсиибит» үҥкүү күрэҕэр «Талба» Индигир нэһилиэгин бэтэрээннэрэ кыайыы өрөгөйүн биллилэр. «Көр- күлүү
эйгэтигэр» сыаҥка күрэҕэр «Арчыына» Хонуу бэтэрээннэрэ тэҥнээхтэрин булбатылар.
Түмүккэ 1 миэстэни «Арчыына» Хонуу (салайааччы Ирина Николаевна Слепцова), 2 миэстэни «Талба» Индигир
(салайааччы Евдокия Иннокентьевна Слепцова), 3 миэстэни «Алгыс» Орто Дойду (салайааччы Кылаана Егоровна
Слепцова) ылан үөрүүлэрэ үксээтэ. Муҥутуур кыайыылааҕынан, Гран- при — «Арчыына» Хонуу бэтэрээннэрин түмсүүтэ
уонна көһөрүллэ сылдьар кубок хаһаайыннарынан буоллулар. Кыттааччыларга барыларыгар Гаврил Петрович Слепцов —
I (Улахан Хабырылла) кыыһа Дария Гаврильевна Черова быраатын Дмитрий Гаврильевич Слепцов "Арҕаа таастар
номохторо, кэпсээннэрэ" кинигэтин туттартаата.
Кыайыылаахтарга олохтоох нэһилиэк дьаһалтатын аатыттан бириистэр туттарылыннылар. Маннык тэрээһини тэрийбит
Индигирдээҕи норуот
айымньытын дьиэтин эдэр кэскиллээх үлэһиттэригэр Яков Егорович Уваровскайга, Нюргустан Афанасьевич Уваровскайга
уонна Индигир нэһилиэгин бэтэрээннэрин сэбиэтигэр истиҥ махтал тыллар этилиннилэр.
Ити курдук бэтэрээннэр эдэр саастарын эргитэн, астына кэпсэтэн, дуоһуйа сынньанан тарҕастылар.
Өссө даҕаны кырдьары кыйдаан, эдэрдии эрчимҥитин ыһыктыбакка сылдьыҥ, ытык бэтэрээннэрбит!
Айталина Николаева