Кыайыы күнүн көрсө ыам ыйын 6 күнүгэр арочнай спортивнай саалатыгар бэтэрээннэр Арчы дьиэлэрин салайааччыта СӨ культуратын үтүөлээх үлэһитэ Ирина Николаевна Слепцова уонна оройуоннааҕы бэтэрээннэр сэбиэттэрин бэрэссэдээтэлэ СӨ бочуоттаах бэтэрээнэ Евдокия Ивановна Слепцова тэрийиилэринэн үгэскэ кубулуйбут «Санаа сааһырбат: — дууһа кырдьыбат» бырайыак чэрчитинэн, бэтэрээннэр спартакиадалара буолан ааста. Спартакиада үөрүүлээх аһыллыытын тэрийээччилэр Евдокия Слепцова, Ирина Слепцова уонна хапытааннар Арассыыйа гимнин тыаһынан өрөспүүбүлүкэ былааҕын өрө күөрэччи таһаардылар.Эҕэрдэ тылы оройуон дьаһалтатын аатыттан социальнай боппуруостарга баһылыгы солбуйааччы Акулина Кульбертинова тиэртэ. Кини
бэтэрээннэри Кыайыы 79 сылынан эҕэрдэлээтэ, чөл олоҕу өрө тутан, кэнчээри ыччакка үтүө холобур буолалларын
тоһоҕолоон бэлиэтээтэ. Салгыы оройуоннааҕы бэтэрээннэр сэбиэттэрин бэрэссэдээтэлэ Евдокия Слепцова
бэтэрээннэргэ истиҥ тыллары тиэрдэн махтанна. Ким тулуурдаах, дьулуурдаах кыайдын диэн баҕа санаатын эттэ.
Бырайыак ааптара Ирина Слепцова Иэйэхсит ыйынан эҕэрдэлээн туран, үтүө алгыһын тиэртэ.Күрэхтэһээччилэр,
ыалдьааччылар алгыс ылан сүргэлэрэ көтөҕүлүннэ.
Спартакиадаҕа 3 хамаанда илин-кэлин түһүстүлэр. Ол курдук, «Күөх маай» (хапытаан Юрий Софронов), “Кыһыл
сулус” (хапытаан Егор Слепцов), «Саһарҕа» (хапытаан Александра Михеева) хамаандалар 7 бэрт тыҥааһыннаах
түһүмэхтэри аастылар. Спортсменнар сүүрэн, атыллаан-хардыылаан, мээчик быраҕан, балыктаан, дартс, боулинг
курдук көрүҥнэргэ күрэхтэһэн сытыытык кииристилэр. Бары да эдэр саастарын эргитэн, эрдээх санааларын киллэрэн кыайыыга дьулуурдарын көрдөрдүлэр. Бииртэн биир түһүмэхтэри туораан, түмсүүлээхтэрин көрдөрөн спартакиада бэрт интэриэһинэйдик ааста.
Спартакиада түмүгүнэн, бастакы миэстэни «Саһарҕа»хамаанда ылан, кыайыы өрөгөйүн биллэ, биир эрэ очконан
хаалан “Кыһыл сулус” иккис миэстэҕэ. «Күөх маай» үһүс бочуоттаах миэстэҕэ таҕыстылар. Күрэхтэһээччилэр
мэтээллэринэн, грамоталарынан наҕараадаланнылар. Спартакиаданы А.В.Карпов аатынан оҕо спортивнай
оскуолатын тренерэ Александр Слепцов ыытта. Кини ытык мааны бэтэрээннэргэ чөл туруктарын бөҕөргөтөн,
хаамыынан дьарыктаналларыгар анал хаалыктары оскуола аатыттан бэлэхтээтэ. Тэрийээччилэр Ирина Слепцова,
Евдокия Слепцова оскуола кэлэктиибигэр, күүс-көмө буолбут дьонноругар истиҥник махтаннылар. Тэрээһини
Сандаара Скороходкина хаартыскаҕа түһэрэн, видеоҕа устан ситэрэн-хоторон биэрдэ.
Ытык мааны бэтэрээннэрбит сааһырдыбыт диэн олорон хаалбакка, билигин даҕаны сүүрэ-көтө сылдьаллар, үтүө
холобуру көрдөрөллөр. Спартакиадаҕа кыттыбыт Евдокия Дмитриевна Сен-Дун-Шен 83 саастаах, Юрий Николаевич
Софронов 81 саастаах аҕам саастаах дьоннорбутунан киэн туттабыт.
Ытык бэтэрээннэрбитин Кыайыы 79 сылынан эҕэрдэлиибит, чөл чэгиэн туруктаах, уһуннук дьоллоохтук олоруҥ диэн алгыспытын аныыбыт.
Айталина Николаева