Аҕа дойдуну көмүскээччилэр күннэригэр А.Ф.Старков аатынан Төбүлэх орто оскуолатын үөрэнээччилэрэ байыаннай маршировкаҕа күрэхтэстилэр. Тэрээһин саҕаланыытыгар эҕэрдэ тыллары оскуола директора В.В.Васильев эттэ. Кини мустубут дьону бырааһынньыгынан истиҥник эҕэрдэлээн туран, Аҕа дойдутун хорсуннук көмүскүү сылдьан, сэрии хонуутугар охтубут биир дойдулаахпыт Александр Кудриҥҥа анал стендэ турда, хорсун быһыы үйэлэргэ үтүө өйдөбүл буолла диэтэ. Салгыы эҕэрдэ тылы Ангелина Старкова эттэ.
Маршировкаҕа 4 хамаанда кытынна. Жюри састаабыгар армияҕа сулууспалаабыт Афанасий Никулин, Семен Корякин, Игорь Васильев үлэлээтилэр. Хамаандалар бары киирэн кылаабынай хамандыыр Гаврил Соркомовка рапорт эттилэр, бэйэлэрин дьоҕурдарын көрдөрдүлэр. Бэрт үчүгэй көрдөрүү кэнниттэн бастакы миэстэ «Пограничниктар»(хам. Уруйдаана Слепцова), иккис «ВДВ» (хам. Дьулуур Седалищев), үһүс «Морской флот» (хам. Оксана Эверстова), төрдүс «Сухопутные войска» (хам. Артур Васильев) буоллулар. Кыттааччыларга барыларыгар минньигэс бириис туттарылынна.
Салгыы » Снежный барс» военнай күрэхтэһиигэ икки хамаанда «Красная Армия» уонна «Ястреб» илин-кэлин түһүстүлэр. Хамандыырдар Ефрем Эверстов, Сарыал Николаев хамаандаларын кыайыыга күөртээтилэр. Күрэх 7 түһүмэхтэринэн ыытылынна. Ол курдук противогаз кэтэн сүүрүү, боппуруостарга эппиэттээһин, ох саанан ытыы, сыыллан кэлэн сыал быраҕыы, сэрии кэминээҕи ырыалары таайыы, сүүрэн кэлэн сыал ытыы(биатлон), эстафета.
Бэрт эрийсиилээх күрэхтэр кэннилэриттэн «Красная Армия»инники түстэ.
Киэһэтин сонун, саҥа «Хомуур күрэх» оонньууга оҕолортон аҕа саастаахтарга тиийэ кытыннылар. Манна 50 кубиктары ким сымса, түргэн, дьааһыкка бириэмэҕэ уктулар. Манна алын сүһүөх кылаастарга Сулустаан Никулин бастаата, орто сүһүөхтэргэ Вова Никифоров, улахан сүһүөх кылаастарга Ефрем Эверстов, орто саастаахтарга Гаврил Соркомов, аҕа саастаахтарга Владимир Хабаров буоллулар.
Салгыы дартс күрэҕэ элбэх киһини түмтэ. Манна абсолютнай күрэххэ 17 киһи кытынна, кыайыылааҕынан Петр Никифоров буолла уонна харчынан бириэмийэ тутта. Маннык күрэхтэр үүнэн иһэр көлүөнэни патриотическай тыыҥҥа уһуйаллара саарбаҕа суох. Кыра нэһилиэккэ бары биир сомоҕо буолан тэрээһиннэргэ кыттыы бу иитии үлэтигэр үтүө холобур буолар.
Людмила Стручкова.