Сайыммыт үтүө күннэрэ түмүктэнэллэрэ кэллэ. Хаһаайыстыбалаах дьоҥҥо ыгым кэмнэр тураллар. Хаарыан кураан күннэри куоттарбакка от үлэтин түмүктээһин сыала-соруга хаһаайыстыбалары ыксатар.
Бу күннэргэ оройуон дьаһалтатын тустаах биригээдэтэ тыа хаһаайыстыбатын бэтэрээнэ, ытык киһибит Бүөтүр Корякиҥҥа от кэбиһиитигэр субуотунньуктаата. Петр Васильевич оройуоҥҥа чааһынай хаһаайыстыбаны тутар дьоннортон саамай саастаахтара буолар. Онон дьаһалта уолаттара чахчы да сөптөөх быһаарыныы ылынан көмө оҥороллор.
Биригээдэ састаабыгар улахан дьону кытта оскуола үөрэнээччилэрэ Володя Ильин, Кирилл Садыков тэҥҥэ үлэлэһэн ветеран махталын ыллылар. Көхтөөх үлэ түмүгүнэн 3 от туран Петр Васильевич үөрүүтэ үгүс. Атын да тэрилтэлэр от үлэтиттэн туора турбакка чааһынай хаһаайыстыбалары өйүөхтэрэ диэн эрэнэбит.
«Муома оройуона» МТ пресс-сулууспата.