Ыам ыйын бүтүүтэ дойду үрдүнэн “Бүтэһик чуораан” бары оскуолаларга чугдаарбыта. Онтон ыла биир ый ааһа оҕуста. Бу кэм устата 9 уонна 11 кылаас үөрэнээччилэрэ математикаҕа, нуучча тылыгар уонна талан ылбыт биридимиэттэригэр судаарыстыбаннай эксээмэннэри туттардылар. Ыйы быһа долгуйуу, бэлэмнэнии, кэтэһии… Дьэ, бэйэ билиитин тургутуу айана биэтэккэ чугаһаата. Бу күннэргэ оскуола сүрүн уонна уопсай үөрэхтээһинин бүтэрэр оҕолор ситии-хотуу аттестатын ылар түгэннэрэ үүннэ.
Бэс ыйын 26 күнүгэр Муома орто оскуолатын бүтэрэр 23 үөрэнээччитигэр анаан “Выпускной бал” ыытылынна. Кыталык кыргыттар кэрэ бэйэлэрэ өссө тупсан, мохсоҕол уолаттар ордук дьоһуннанан мааны көстүүлэринэн сааланы киэргэттилэр. Быйыл 11 “А” кылааһы16 оҕо (салайааччы Л.С. Неустроева), 11 “Б” биолого-химическэй уонна технологическай хайысхалаах кылааһы 7 оҕо (салайааччы Е.М. Неустроева) түмүктээтилэр. Оскуола дириэктэрэ В.В.Тихонова үөрүүлээх быһыыга ситии-хотуу аттестаттары оҕолорго туттарда. Муома орто оскуолатын быйыл үс үөрэнээччи: Эмма Артамонова, Евгений Винокуров, Лилиана Новгородова — туйгун сыаналаах кыһыл аттестатынан уонна “Үөрэххэ үрдүк ситиһиилэрин иһин” иккис истиэпэннээх мэтээллээх бүтэрэр чиэскэ тигистилэр. Кинилэр үһүөн биир кэлим эксээмэннэрин 60-тан үрдүк баалга туттаран, ылбыт билиилэрин бигэргэттилэр.
Туйгун үөрэнээччи Евгений Винокуров Өрөспүүбүлүкэбит Ил Дарханын А.С.Николаев анал бэлиэтин тутан үөрүүтэ үрдээтэ.
Үгэс быһыытынан, оскуоланы бүтэрэр оҕолорго сылын аайы анал истипиэндийэ ананар. Ол сиэринэн,үөрэҕэр үрдүк
көрдөрүүлээх, үгүс ситиһиилээх оҕолор меценат дьон бэлиэ наҕараадаларын туттулар. Ол курдук“Үөрэҕирии туйгуннара – үөрэх туйгуннарыгар”истипиэндийэ Евгений Винокуровка, Лилиана Новгородоваҕа, Эмма Артамоноваҕа бэрилиннэ. Оскуола биир бастыҥ уолана Дыгын Охлопков уйулҕа билимин хандьыдаатын Иосиф Петрович Хабаров аатынан, 2003-2008 сс. Муома баһылыгынан үлэлээбит Сергей Августович Сюльскай анал истипиэндийэлэрин уонна Муома аэропордун начальнига Юрий Винокуров анал сэртипикээтин тутта. Педагог уонна суруналыыс Иннокентий Афанасьевич Неустроев аатынан Лилиана Новгородоваҕа туттарылынна. Спортсмен Юрий Афанасьевич Неустроев уонна СӨ үөрэҕириитин туйгуна Дмитрий Александрович Мосенков ааттарынан истипиэндийэни Ким Громов ылла. Мосенковтар дьиэ кэргэннэрэ аҕаларын аатынан истипиэндийэни Егор Корякиҥҥа эмиэ анаатылар. Ону таһынан култуура үлэһиттэрин Корякиннар дьиэ кэргэннэрэ Айтал Слепцовка, Ыччат политикатын туйгуннара Анна Слепцова, Василий Аммосов анал истипиэндийэлэрэ Анастасия Петроваҕа туттарылынна. Маны сэргэ ГУП ЖКХ, “Якутскэнерго”, оройуоннааҕы үөрэҕирии тэрилтэлэрин профсоюзтара харчынан бириэмийэлэри, Тарабукиннар дьиэ кэргэннэрэ, Татьяна Данилова анал сэртипикээттэрин оскуола выпускниктарыгар туттардылар.
Бу күн үгүс махтал, эҕэрдэ тыллара этилиннилэр, ыллам ырыа ылланна, сахалыы, аныгы үҥкүү үҥкүүлэннэ, оонньуу-көр оонньонно.
Олох киэҥ аартыгар үктэнээри турар оҕолорбут санааларын үллэһиннилэр:
Охлопков Дыгын — эксээмэннэрбин өссө да арыый үрдүк баалга туттарар баҕалааҕым, ол да буолларсанаабын түһэрбэппин. Бэйэм история учуутала буолар санаалаахпын. Учууталларбар ситиһиини, үчүгэй доруобуйаны баҕарабын, барыгытыгар олус махтанабын. Билигин үөрэнэ сылдьар оҕолорго сүрэҕэлдьээбэккэ үчүгэйдик үөрэниҥ диэн сүбэлиибин.
Винокуров Евгений – биир кэлим эксээмэннэрбин үрдүк баалга туттаран олус үөрдүм. Нуучча тылын 89 баалга туттардым. Үөрэххэ кыһамньылаахтык сыһыаннаһан, консультациялары көтүппэт уонна бэйэҥ дьаныардаахтык дьарыктаннаххына, эксээмэн түмүгэ ситиһиилээх буолар. Тохсус уонна уон биирис кылаастары ордук өйдөөн хааллым, саамай эппиэтинэстээх сыллар. Быйыл Санкт-Петербурга медицинскэй үөрэххэ туттарсар санаалаахпын уонна идэбин баһылаан баран, Муомаҕа үлэлии кэлиэҕим.
Слепцова Алика – Оскуоланы бүтэрээри туран оҕолорбор ситиһиини, талбыт үөрэхтэригэр киирэллэригэр баҕарабын. Төрөөбүт дойдубар куйаар ситимэ күүһүрэрэ буоллар. Үөрэнэр кэммэр бэһис кылааска саҥа киирбиппитин өйдөөн хаалбыппын, оччолорго оскуолабыт сабыс-саҥа этэ. Мин култуура үөрэҕэр туттарсар санаалаахпын.
Петрова Настя – уон биирис кылааһы ордук өйдөөн хааллым. Арассыыйа куораттарыгар графическай дизайн үөрэҕэр киириэхпин баҕарабын. Оскуолабар, учууталларбар кыһаллан үөрэппиттэригэр улаханнык махтанабын, билигин үөрэнэ сылдьар оҕолор учууталлар тылларын истэллэригэр сүбэлиибин.
Васильев Айсен – эксээмэннэрбин өссө үчүгэйдик туттарар кыахтаах этим дии саныыбын, ол эрээри баалларым наһаа намыһах буолбатах. Математика уонна информатика учуутала буолар санаалаахпын, Муомаҕа кэлэн үлэлиэм этэ. Дойдубутугар учууталлар тиийбэттэр. Оскуолабытыгар араас элбэх тэрээһин ыытыллар, мин саҥа оскуолаҕа көһөр түгэммитин ордук өйдөөн хаалбыппын. Үөрэнэр кэмҥэ уруоктарга кыһаллар наада, учууталлар тугу биэрэллэрин барытын иҥэрэн иһэр ордук.
Слепцов Айтал – эһиилги выпускниктарга эксээмэннэрин үчүгэйдик туттардыннар диэн баҕарабын, оскуолабар үчүгэй үөрэнээччилэри баҕарабын. Инники былааммар култуура өттүгэр артыыс үөрэҕэр туттарсан көрүөм этэ.
Кэлэр кэскилбит ыра санаата туолуохтун, үтүө сүбэтэ тиийиэхтин. Төрөппүт, учуутал алгыс тыла сыаланнын, баҕа санаата барҕардын!
Онтон мантан салгыы оскуола түмүк таһаарар үлэтэ бүппэт. 9-с кылааһы бүтэрэр оҕолор аттестат ылыахтара уонна эксээмэн резервнэй күннэрэ салҕана тураллар. Бэлиэтээн эттэххэ, быйыл дойду бэрэсидьиэнэ В.В.Путин уурааҕынан уларыйыы киирбитэ, ол курдук оскуоланы бүтэрэр оҕо эксээмэнин баалын тупсарыан баҕалаах буоллаҕына, иккистээн туттарыан сөп. Ол быраабынан МОО-тын икки оҕото туһанар буолла, кинилэр талбыт биридимиэттэригэр БКЭ-ни кэлэр ый 4-5 күннэригэр хаттаан ааһыахтара.
Кэнчээри ыччаппыт талбыт үөрэхтэригэр киирэн, идэлэрин баһылаан төрөөбүт сирдэригэр Муомаҕа төннүөхтэрэ, дойдуларын аатырдар үтүөлээх исписэлиис буола үүнүөхтэрэ диэн эрэнэбит.
Оҕолор уонна төрөппүттэр болҕомтолоругар, Саха сирин орто уонна үрдүк үөрэх тэрилтэлэрэ бэс ыйын 20 күнүттэн докумуону тутууну саҕалаатылар. Муома оройуонун выпускниктарыгар анаан Абитуриент штаба сайыны быһа үлэлиир.
Татьяна Данилова