Муома оройуонугар нотариус олохсуйан үлэлээбэтэҕэ 3-4 сыл буолла. Нэһилиэнньэттэн олус элбэх туруорсуу киирдэҕинэ сылга биирдэ урут манна үлэлээбит Анна Кривошапкинаны Ленскэй оройуонуттан көҥүллэтэн аҕалааччыбыт. Атын оройуон үлэһитэ ыгым кэмҥэ кэлэн элбэх дьон кыһалҕатын быһаара сатааччы, ол эрээри итинник үлэ кыһалҕалаахтарга тутах буолааччы.
Олох сокуона биир ирдэбилгэ турбат, ардыгар көһүппэтэх өттүлэриттэн дьон иэдээҥҥэ түбэһэн нотариус көмөтүгэр наадыйар кыһалҕаланаллар. Аныгы кэм ирдэбилинэн туох барыта бириэмэтинэн хааччахтаах. Дьэ маннык ыгым кэмҥэ нотариус миэстэтигэр баара олус абыраллаах буолар. Ааспыт ыйтан саҕалаан оройуон дьаһалтатын дьиэтигэр бэйэбит кыыспыт, олохтоох кадр Анна Саввина нотариус быһыытынан үлэтин саҕалаата. Кини киэҥ билиилээх специалист буолар. Ол курдук нуучча тылын уонна литературатын учуутала, юрист үөрэхтээх, муниципальнай бэйэнии салайыныы уо.д.а. дипломнардаах. Анна Иннокентьевна оройуон олохтоохторун ордук нэһилиэстибэни сокуоннайдык оҥотторууга кыһалҕаны көрсөрүн көрөн бу сэдэх идэҕэ анаан үөрэнэн тустаах үлэтин саҕалаата. Кини кэпсииринэн олохтоохтор кырдьык да нэһилиэстибэни сокуоннайдык оҥостууга элбэҕи билбэттэр эбит. Онон нотариус көмөтүгэр наадыйаллара үгүс. Билигин уоппуска, каникул эҥин кэмэ буолан нотариуска улахан уочарат суох. Инникитин нэһилиэктэринэн өҥөнү тиэрдии үлэлэрэ былааннаналлар. Оттон кыһалҕалаахтар үлэ кэмигэр оройуон дьаһалтатын дьиэтигэр кэлэн нүөмэрдээх хоско быһаартарыахтарын сөп. Биһиги саҥа идэни баһылаабыт бэйэбит биир дойдулаахпытыгар А.И. Саввинаҕа ситиһиилэри баҕарабыт.
«Муома оройуона» МТ пресс-сулууспата