Алтынньы 10 күнүгэр олохтоох бэйэни салайыныы бэрэстэбиитэллээх уорганын ахсыс ыҥырыылаах Муоматааҕы оройуон Сэбиэтин депутаттарын бастакы сессиялара буолан ааста. Мунньах Саха сирин, оройуон Өрөгөй ырыаларынан доҕуһуолланан саҕаланна. Сессияны оройуон баһылыгын э.т. Христина Кривошапкина эҕэрдэ тылынан саҕалаата. Оройуоннааҕы территориальнай быыбардыыр хамыыһыйата (бэр.солб. Старкова М.П.) саҥа талыллыбыт оройуон депутаттарыгар сололорун туоһулуур дастабырыанньалары үөрүүлээх быһыыга-майгыга туттарда. Бэбиэскэҕэ сүрүн боппуруоһунан депутаттарын Сэбиэттэрин мунньаҕын бэрэссэдээтэлин талыы турда. Кистэлэҥ куоластааһын түмүгэр ааспыт сэттис ыҥырыылаах мунньах бэрэссэдээтэлэ Серафим Мараказов иккистээн депутаттар итэҕэллэрин ылла.
«Муома оройуона» МТ пресс-сулууспата.