Аҕыйах сыллааҕыта икки этээстээх саҥа Муома орто оскуолата олоххо киирэн оройуон Киинин биир кэрэ көстүүлээх объега буолан дьэндэйэн турар. Урукку оскуолаҕа алын сүһүөх кылаастар көһөн кэлбиттэрэ. Быйыл «Үөрэҕирии ситимин саҥардыы» федеральнай бырагыраама чэрчитинэн өтөрүнэн буолбатах, кэтэһиилээх өрөмүөн үлэтэ ыытылла турар. “Бэдэрээтчитинэн Алексей Захаров салайааччылаах “Мас-строй” ААУо бу саас муус устартан үлэтин саҕалаабыта. Тутуу матырйааллара, саҥа тэриллэр кыһыҥҥы суолунан кэмигэр кэлбиттэрэ. Оҕолор сааскы каникулга улахан оскуолаҕа көһөн, иккис сменанан үөрэх дьылын этэҥҥэ охсуута суох түмүктээбиттэрэ. 165 үөрэнээччилээх оскуола өрөмүөнүгэр 74 мөл.солк. курдук үп-харчы көрүллүбүтэ. Үлэһиттэр араас хайысханан 7 биригээдэнэн үлэлииллэр. Фундаменын көтүрүүгэ, тас истиэнэтин, үрдүн бүрүөһүнүн саҥардыыга, түннүгүн оҥорууга, ис бараанын тупсарыыга араас тутуу идэлээх дьон үлэлэрэ тэтимнээх. Билигин уот ситимин тардыыта ыытыллар. Оскуола тэрилигэр уопсайа 11 мөл.солк. көрүллүбүтэ, ол иһигэр остолобуойга эмиэ саҥа тэриллэр таҥыллыахтара. Улахан иэннээх үлэ хаамыытын оройуон дьаһалатата, үөрэҕирии Управлениета, төрөппүт хонтуруолун Штаба нэдиэлэ аайы хамыыһыйанан улахан хонтуруолга туталлар” – диэн кэпсиир оскуола директора Альбина Петрова.
Оскуола олбуора аныгылыы 3D технологиянан таҥыллан оҥоһулунна. “Маннык олбуор Төбүлэх орто оскуолатыгар эмиэ саҥардылынна” – диэн эбэн этэр оройуон Аҕа баһылыга Дмитрий Аммосов.
“Муома оройуона” МТ пресс-сулууспата