Бу өрөбүллэргэ ыаллыы Абый оройуонун Майыар нэһилиэгэр А.Д.Никулин кэриэһигэр көҥүл тустууга Халыма-Индигир оройуоннарын аһаҕас турнира ыытылынна.
Манна биһиги оройуоммут чиэһин көмүскүү оскуолалартан чулуу бөҕөстөр кытыннылар. Ол курдук кулун тутарга Аммаҕа ыытыллыбыт өрөспүүбүлүкэтээҕи турнирга Н.А.Брызгалов аатынан Индигир орто оскуолатын үөрэнээччитэ Дьулусхан Черов бэркэ киирсэн улахан түһүлгэ кыайыылааҕа буолбута. Бирииһигэр — баҕалаах бэлисипиэккэ олус үөрбүтэ. Харизмалаах уолу көрөөччүлэр, спортивнай комментатордар бэлиэтии көрөн биир дойдулааҕа Никита Хабаровка холоон «Момская скала-2» диэн сүрэхтээбиттэрэ, Интернет таһаарыыларга видеолар киэҥник тарҕаммыттара. Ол кэннэ Дьулусханы тустууну сэҥээрээччилэр уулуссаҕа, аэропортка билэн илии тутуһан дорооболоһор буолбуттар.
Бу сырыыга Дьулусхан оскуолатын, оройуонун хамаандатыгар киирэн бэйэтин ыйааһыныгар иккис, хапсаҕайга абсолютнай кыайыылаах буолла. Турнир түмүгүнэн «Кэскиллээх бөҕөс» аат иҥэрилиннэ.
Абсолютнайга кыайыытын иһин сүрүн бирииһи — бэлисипиэт ылан уол үөрүүтэ муҥура суох. Дьулусхан алта оҕолоох ыал төрдүс уола, бу бэлисипиэтин быраатыгар Уйусхаҥҥа бэлэхтиир санаалаах.
Дьулусхаҥҥа өссө да инникитин үрдүк үктэллэри, дабайыылары баҕарабыт.