Соболоох нэһилиэгэр уһун ардах кэнниттэн халлааммыт тупсан окко үөрэ-көтө тахсыы буолла. 4 улахан тимир көлөнөн сыһыы диэки сарсыардаттан айанныыбыт. Ардах суолу мөлтөтөн бэртээхэй көлөбүтүн Өлбөт барахсаҥҥа хаалларан тыраахтарынан тэптэрэн сирбитигэр кэлэбит. Һуу- һаа, суугунаһыы: ким эрэ отууга ас астаабытынан барар, сорохтор түһүлгэ киэргэтиитигэр түбүгүрэллэр.18 эр бэртэрэ — саха боотурдара Баатыр сыһыытын тэлэн киирэн бараллар. Тыас — уус, ырыа тыа саҕатынан сайа биэрэр, ходуһа уһукта түһэр.
Отуу уота оттуллар, түптэ буруота унаарар. Сирбит барахсан сыл буолан баран көрсүһүүгэ үөрбүттүү өҥө өссө тупсар,тумул дьикти кэрэ буолан киэркэйэн көстөр . От охсор мотордар тыастара, дьон саҥата- иҥэтэ өбүгэлэрбит сирдэрин толороллор. Сиэр — туом тутуһуллан сири-уоту аһатан, айах тутан, алҕаан, көрдөһөн от үлэтэ саҕаланар. Дэлэй астаах сандалы остуол саамал кымыс утахтаах, хоточчу буспут сыалаах эттээх, арыылаах алаадьылаах, араас астаах бэлэм буола түһэр. Солкоҕо сууламмыт, сиргэ тиийэр халадаайдаах мааны далбар хотуттар хаамсан суугунаһаллар, үлэ үөһүгэр түһэллэр. Сынньалаҥ киинин кыргыттара саха сиэрин тутуһан окко киириини арыйаллар, эҕэрдэ нүөмэрдэри бэлэхтииллэр. Көрөөччү эрэ барыта сөбүлээн истэр ырыаһыта Николай Корякин ырыата бу да сырыыга сэҥээриини ылыан ылла. Иккис омурҕаҥҥа кулууп кыргыттара хотуур хотойдоругар күрэх биллэрэллэр. Ким да көрдөһүннэрбэккэ, биэс эр бэрдэ уһуннук күүттэрбэккэ, сахалыы таҥна охсоот тутатына ырыаларын утуу -субуу тардан кэбиһэллэр. Дьүүллүүр сүбэ быһаарыытынан «Кэскиллээх ырыаһыт» аатын быйылгы оскуола выпускнига Артур Шкулев ылан салгыны сиигирдэр бирииһи тутар.
«Соһуччу талаан » анал аакка оскуолабыт выпускнига, үлэһитэ Айаан Хабаров тиксэн балаакка бэлэҕи ылар. «Ыллам ырыаһыт»- 3 миэстэ аатын Руслан Никулин ылан вафельница хаһаайына буолар. Иккис миэстэҕэ тахсан оскуола үлэһитэ Алексей Атласов термос бириис тутан үөрүүтэ үксүүр. Муҥутуур кыайыылаах ырыаһыт аата Борис Хабаровка иҥэриллэн сыаналаах күлүүс набора туттарыллар. Дьэ, ол кэннэ сылын ахсын оскуола бастакы күнүн охсооччуларыгар 100% сүүйүүлээх лотерея оонньонно. Ходуһа хоһууннара бары наадалаах малы сүүйэн илии тутуурдаах, өттүк харалаах дьиэлииллэр. Отучча киһилээх оттооһун маннайгы күнэ бэрт сэргэхтик, өрө көтөҕүүлээхтик ааһар. Сайыммыт өлгөм үүнүүлээх буоларыгар эрэли үөскэтэр.
Раиса Старкова.