Кыайыы 80 сылыгар аналлаах Кыайыы былааҕын эстафетата салгыы Абый оройуонун ытык сиригэр айаннаата. Муома оройуонун делегацията баһылык Дмитрий Викторович Аммосов салайааччылаах байыаннай таҥастаах кыайыы былааҕын күөрэччи тутан, Абый оройуонун дьонугар-сэргэтигэр, оройуон баһылыгар Новиков Владимир Вадимовичка үөрүүлээх быһыыга-майгыга туттарда. Кэбэргэнэ сиригэр олохтоохтор бэлэмнэнэн өрө көтөҕүүлээхтик үөрэн-көтөн көрүстүлэр. Сэрии кэмин санатар, эйэлээх олох туһугар хааннарын тоҕон, олохторун толук уурбут дьоммутун кэриэстиир, сүгүрүйэр аалай кыһыл Кыайыы былааҕын көрсүү тэрээһинэ Абый сиригэр үрдүк таһымнаахтык ааста.
Бу тэрээһиҥҥэ оҕо ускуустубатын оскуолатын иһинэн тэриллибит “Индигир долгуннара” вокальнай ансаамбыл кыттыыны ылан, Кэбэргэнэ нэһилиэгин олохтоохторугар «Эн ыллаа, бу дьолу айхаллаан» анал байыаннай дьайыыга сылдьар биир дойдулаахтарбытын өйүүр сыаллаах аһымал кэнсиэри бэлэхтээтэ. Кэнсиэр кэмигэр оройуон баһылыга Дмитрий Викторович Аммосов Кэбэргэнэ олохтоохторугар Муома оройуонун дьоно туох көмөнү оҥорбуттарын иһитиннэрэн, махтанан уонна сааскы кэрэ бырааһынньыгынан эҕэрдэтин тиэртэ. Кэскиллээх эдэр ырыаһыттар Николай Буртахов, Родион Дьяконов ылбаҕай ырыаларын көрөөччүлэр дохсун ытыс тыаһынан көрүстүлэр. Кэнсиэр устата «Индигир долгуннара» ансаамбыл кыттааччыларын хас биирдии тахсыылара, ырыалара, уобарастарын толорон биэрэр таҥастара-саптара нэһилиэк олохтоохторун сэҥээриитин ыллылар. Кэнсиэр кэнниттэн элбэх махтал тыллар этилиннилэр. Ыалдьытымсах ыаллыы сытар нэһилиэк дьоно, Слепцов П.Э. аатынан “Эдек” ЭКК үлэһиттэрэ кэлбит ыалдьыттары итии астаах сандалы тардан, тоҥ балыгынан күндүлээтилэр. Кэбэргэнэ нэһилиэгин баһылыга Атласов Иван Иванович, муомалара күтүөттэрэ үтүө истиҥ тылынан махтанна.
“Индигир долгуннара” вокальнай ансаамбыл кыттааччылара маннык улахан суолталаах, үрдүк таһымнаах тэрээһиҥҥэ кыттан кэлбиттэригэр оройуон аҕа баһылыгар Дмитрий Викторович Аммосовка, оҕо ускуустубатын оскуолатын дириэктэригэр Анна Митрофановна Федороваҕа, Арчы дьиэтин салайааччытыгар Ирина Николаевна Слепцоваҕа, «Осикат» ЭКК дириэктэригэр Алексей Алексеевич Варламовка уонна суоппардарга Тихон Васильевка, Владимир Жирковка истиҥ махталларын тиэрдэллэр.
Ансаамбылга сыл-
дьар ийэлэр, эбэлэр ырыанан эрэ муҥурдаммакка, Кыайыы сылыгар аналлаах «80 сылга – 80 үтүө дьыала» акциятыгар көхтөөхтүк кытталлар. Ол курдук, кэнсиэртэн киирбит үбү-харчыны анал байыаннай дьайыыга сылдьар уолаттары уонна кинилэр дьиэ кэргэттэрин өйүүр пуондаҕа киллэриэхтэрэ. Ону таһынан сылгы кутуругуттан байыастарга атах таҥаһыгар сылаас угунньа (стелька) оҥорон саҕалаатылар.
Ити курдук «Ким түмсүүлээх – ол кыайыылаах» тэрээһинэ кэнчээри ыччаттарбытыгар холобур буолан, ааспыт сэрии кэмин өйдөрүгэр-санааларыгар иҥэрэн, дириҥ сибээһин күүһүрдэн, бэриниилээх буолууга иитии улахан суолталаах. Бу курдук олоҕу таба көрөргө, өйдүүргэ, төрөөбүт түөлбэни таптыырга, харыстыырга, көмүскүүргэ, махталлаах буоларга бэйэбит холобурбутунан үөрэтиэхтээхпит, иитиэхтээхпит.
Айталина Николаева