Сааскы сырдык сыдьаайдаах бастакы кэрэ бырааhынньык тэрээһиннэрэ саҕаланнылар.
Бэҕэһээ, кулун тутар 6 күнүгэр, Н.А.Брызгалов аатынан Индигир орто оскуолатыгар
Кэрэ ситим, кэрэ көстүү, кэрэ эйгэ, кэрэ кэрэни үөскэтэр, кэрэттэн кэрэ салҕанар — диэн ааттаах кэрэ куоларга тэрээһин буолла.
Бу тэрээһиҥҥэ Муома оройуонугар дириҥник ытыктанар туспа суоллаах- иистээх, сөбүлүүр дьарыктарынан толору дьоллонон,астынан үлэлии сылдьар нарын намчы Куолар — Любовь Николаевна Федорова уонна Дайаана Геннадьевна Филиппова ыалдьыттаатылар.
Любовь Николаевна идэтинэн учуутал, ону сэргэ сөбүлүүр дьарыга — үҥкүү буоларын бары билэбит.
Кини 2006 сылтан Муома оройуонугар «Тэтим» норуодунай үҥкүү ансаамбылын салайааччыта. Оҕо сааһыттан үҥкүү алыптаах эйгэтигэр уйдарбыт, дьиҥнээх сөбүлүүр дьарыга.
Үҥкүүнэн дьарыктаныы аҥаардас хамсаныылары эрэ сатабыллаахтык оҥороллорун эрэ көрүү буолбатах.
Үҥкүү ис хоһоонун өйдөөммүт, дууһабытын уураммыт, турукка киирэн үҥкүүлүүбүт. Ис дууһаларыттан үҥкүүлүүр үҥкүүһүттэр бэйэлэрэ эрэ буолбакка, көрөөччүлэри эмиэ турукка киллэрэр кыахтаахтарын кэпсээтэ.
Үҥкүү диэн бу ураты талаан, дьоҕур айылҕанан ананан бэриллэр. Любовь Николаевна
үҥкүүнэн дьарыктаныы тус бэйэҕэ дьайар өрүттэрин сиһилии холобурдаан кэпсээтэ уонна көрдөрдө.
Дайаана Геннадьевна — кондитер. Искусство биир көрүҥэ.Оҕо сааһыттан астыырын олус сөбүлүүр. Оройуоҥҥа бастакы «Ворлдскиллс»күрэхтэн кынаттанан, бэйэтин былаанын олоххо киллэрээри бигэ санаалаах туруммут. Арассыыйа таһымнаах күрэхтэргэ кыттан ситиһиилэрэ үгүс.
Түөрт сыл анал үөрэххэ үөрэнэн, повар-кондитер идэтин баһылаабыт.
2022 сылтан сөбүлүүр дьарыгын салҕаан төрөөбүт дойдутугар кэлэн үлэлии сылдьар.
… Торт астыыр диэн сакаасчыттан, сакааһы ылааччыттан, ингредиеннэри атыылааччыттан саҕалаан хас биирдии оҥорооччуга тиийэ элбэх киһи биир тэтимҥэ киирэрин эрэйэр интириэһинэй үлэ.
Хас биирдии маастар бэйэтэ буочардаах, ырысыаптаах, сакаасчыттардаах — бары үүт-үкчү буолбатахпыт.
— Үлэлиэххэ наада диэн бигэ сыал-сорук туруорунабын, үлэлииргэ күүс булабын, — диир эдэр кондитер.
Тэрээһин сүрүн сыала — кыыс оҕо төрүт ууһу утумнааччы, алаһа дьиэ араҥаччыта буоларын өйдөтүү, кэрэни кэрэхсииргэ, үчүгэйи үксэтэргэ уһуйуу, сүбэлээһин,сөбүлүүр дьарыктарын сатабылларыгар сыһыаран үөрэтии, сайыннарыы, иитии.
Ыалдьыттарбыт талааннара, дьоҕурдара,сатабыллара муударай тыллара-өстөрө, ырааҕы-киэҥи ырыҥалыыр санаалара хас биирдии кэрэ аҥардарга дириҥник киирдэ.
Любовь Николаевна, Дайаана Геннадьевна сөбүлүүр дьоҕурдарын сайыннаран,тирэҕирэн
Айар эйгэни кытта эттэринэн-хааннарынан, өйдөрүнэн-санааларынан билсэннэр, талбыт идэлэрин толору баһылаан, үтүө үлэһит буолбуттар.
Кэрэ кэрэни үөскэтэр, быстыспат ситим салҕанан көлүөнэттэн көлүөнэҕэ бэриллэр айылҕалаах. Харыстааҥ кэрэни, харыстааҥ кыыс оҕо быстыспат кэрэ ситимин, дьоҕурун, талаанын.
Светлана СЭНД