Сэтинньи 26 күнүгэр А.В.Карпов аатынан оҕо спортивнай оскуолатын спортзалыгар Муома оройуонугар 2018-2021 сылларга баһылыгынан талыллан үлэлээбит Иван Петрович Павлов сырдык кэриэһигэр анаммыт футболга күрэхтэһии ыытылынна.
Бу мемориал үһүс сылын ыытылынна. Сыллата ыытыллар буолан оонньооччулар маастарыстыбалара үрдээбит диэн бэлиэтииллэр судьуйалар.
Быйыл суолга тарыҥ тахсыбытынан Чыбааҕылаах уонна Соболоох нэһилиэктэрин хамаандалара кыттыыны ылбатылар.
Индигир нэһилиэгиттэн үөрэнээччилэр хамаандалара кэлэн чаҕылхай оонньуулары көрдөрдүлэр. Бу иннинээҕи күрэхтэһиилэр фавориттарын кытта сытыытык кииристилэр.
Бу оскуола хамаандатыттан Кирилл Слепцов — «Кэскиллээх оонньооччу», Артем Никулин — «Бастыҥ гол» ааттар хаһаайыннарынан буоллулар. Никита Андросов предприниматель Виктор Габышев анал бирииһин тутта. Онон Индигир орто оскуолатын тус хамаандата бастакы сүрэхтэниини дьоһуннук ааста.
Футбол ыалдьааччылара сыаналыылларынан, быйылгы көрсүһүүлэр олус сытыытык уонна интэриэһинэйдик ааспыттар. Урукку оонньууларга тэҥнээтэххэ, киллэриллибит гол да ахсаана таһыччы үрдүк эбит.
Мемориал муҥутуур кыайыылааҕынан «Ньюкасл» хамаанда таҕыста
Иккис «Спасатель» хамаанда буолла
«Индигир» хамаанда үһүстээтэ.
Турнир бастыҥ оонньооччутунан Иван Карпов («Ньюкасл») ааттанна. Кырдьык даҕаны, Иван кыраһыабай оонньууну уонна хамаандатын тутар кыаҕын көрдөрдө. Салгыы Афиз Иманов («Победа») «Лучший защитник», Иван Архипов («Ньюкасл») «Лучший вратарь», Афанасий Слепцов («Победа») «Лучший нападающий» номинацияларга тигистилэр.
Бу турнирга Иван Павлов дьиэ кэргэнэ, бииргэ төрөөбүттэрэ, аймахтара, бииргэ оскуолаҕа, институкка үөрэммиттэрэ, табаарыстара, Муома оройуонун землячествота сыаналаах бириистэринэн, харчынан, араас маҕаһыын сертификаттарынан көмө тиэртилэр. Ол курдук, анал бириистэрин П.С Гермогенов, В.В.Корякин дьиэ кэргэттэрэ күүстээх оонньууну көрдөрбүт «Ньюкасл» футболистарыгар игирэ уолаттарга Александр Слепцовка, Афанасий Вожжовка туттардылар. Муома оройуонун землячествотын харчынан бирииһин Иннокентий Слепцов («Победа») ылла. Винокуровтар дьиэ кэргэн анал бириистэрэ Николай Слепцовка («Победа») бэрилиннэ. Петр Артамоновка («Спасатель») Иван Павлов институкка бииргэ үөрэммит табаарыстарын бирииһэ туттарылынна. Иван Петрович коллегата Х.П.Кривошапкина анал бирииһэ Кирилл Черемкиҥҥа («Ньюкасл») бэрилиннэ. Муома орто оскуолатын 1983 сыллаахха бүтэрбит Иван Павлов бииргэ үөрэммиттэрэ дьоһун бириистэрин сыл аайы бу мемориалы тэрийэр, ыытар, эдэр спортсменнары эрчийэр А.В.Карпов аатынан спортивнай оскуолаҕа (директор Александр Аргунов) анаатылар. Улахан Чыыстай, Муома нэһилиэктэрин, И.П. Павлов дьиэ кэргэнин, бииргэ төрөөбүттэрин сыаналаах бириистэрэ күрэхтэһии кыайыылаахтарыгар туттарылыннылар.
Быйылгы күрэх ити курдук түмүктэннэ. Эһиил мемориал өссө элбэх кыттааччыны түмтүн.
«Муома оройуона» МТ пресс-сулууспата.