Ахсынньы 21 күнүгэр Дьокуускай куоракка Ил Дархан Харыйатыгар өрөспүүбүлүкэ бары оскуолаларыттан 700-чэкэ үрдүк ситиһиилээх, үөрэхтэригэр чаҕылхай көрдөрүүлээх оҕолор муһуннулар.
Быйыл Муома оройуонуттан үрдүк көрдөрүүлээх алта 11-с кылаас үөрэнээччилэрэ Ил Дархан Харыйатыгар сылдьар чиэскэ тигистилэр: Алехин Михаил (ИОО), Корякина Айлина (УЧОО), Семёнов Никита (МОО), Слепцова Мила (СОО), Уваровская Закира (ОДОО), Эверстов Ефрем (ТОО). Оҕолору куоракка арыаллаан, салайан Муома орто оскуолатын учуутала Алёна Германовна Калугина илдьэ сырытта.
Оҕолор салайааччыларын кытта ахсынньы 16 күнүгэр Дьокуускай куоракка көппүттэрэ.
Нэдиэлэ устата үөрэнээччилэр «Сосновый бор» оҕо сынньанар киинигэр олордулар, киин иҥэмтэлээх аһын аһаатылар. Харыйа кыттыылаахтарыгар араас интэриэһинэй тэрээһиннэр ыытылыннылар, ол иһигэр Арассыыйа Федерациятын Геройун Ф. А. Евсеевы кытта көрсүһүү буолбута.
Субуота күн Марфа уонна Сергей Расторгуев ааттарынан Саха Өрөспүүбүлүкэтин Судаарыстыбаннай циркэтигэр оҕолорго умнуллубат үөрүүлээх түгэн үүннэ. Ил Дархан Харыйатыгар биир дойдулаахтарбыт «Двенадцать месяцев» остуоруйаны астына көрдүлэр, Айсен Николаевтан эҕэрдэ истэн, бириэмийэ тутан сүргэлэрэ көтөҕүлүннэ.
Оҕолор уонна төрөппүттэр оройуон баһылыгар Д. В. Аммосовка, Үөрэҕирии управлениетын начальнигар А. А. Крупышеваҕа, кылаабынай исписэлиискэ Е. Г. Кириллинаҕа уонна салайааччыларыгар А. Г. Калугинаҕа барҕа махтал тылларын тиэрдэллэр.
Оскуоланы бүтэрээри сылдьар Муома чаҕылхай ыччатыгар быйылгы Саҥа дьыл ураты умнуллубат түгэни бэлэхтээтэ .
Ил Дархан Харыйатын сонунун Алёна Калугина иһитиннэрдэ.