Бэҕэһээ Соболоохтооҕу сынньалаҥ киинин үлэһиттэрэ Тарыҥ үрэҕэр «Хоту керлинг» күрэҕи үрдүк тэрээһиннээхтик ыыттылар. Муома оройуонугар аан бастаан керлинг күрэҕэ 2015 сыллаахха ыытыллыбыт, онон быйыл үбүлүөйдээх сыла. Спорт бу көрүҥүн культура бочуоттаах бэтэрээнэ В.Г. Хабаров муомаларга тэрийбитэ. Уон сыл тухары бу көрүҥ сайдыбыт, элбэх киһи астынан туран оонньуур буолбут.
Бэҕэһээҥҥи күрэххэ Соболоохтон уонна Хонууттан барыта 10 хамаанда кыттан күрэҕи сытыырҕаттылар. Күммүт элбэх киһи кэлбититтэн үөрбүт курдук чаҕылыччы тыган дьон санаатын көтөхтө. Соболоохтор кэлбит ыалдьыттарга шашлык буһарыналларыгар эрдэттэн мас бэлэмнээн, хаар күрдьэргэ күрдьэхтэри биэрэн хамаандалар сааскы халлааҥҥа кутаа чэйин иһэн, шашлык амсайан олохтоохторго махталлара улахан. Маны таһынан Соболоох орто оскуолата бурдук аһын, үүтү-кымыһы, эти- буотарагы хото атыылаан ыалдьыттар этэргэ диэри өттүк харалаах, илии тутуурдаах дьиэлээтилэр.
«Хоту керлинг» күрэх 3 этабынан ыытылынна. Ол курдук, хамаандалар бастаан керлиҥҥа маастарыстыбаларын көрдөрдүлэр, онтон боулинг оонньоотулар, саамай ыһыылаах-хаһыылаах этабынан гольф буолла. Маны таһынан хамаандалар музыкальнай нүөмэрдэрин, Кыайыы вальсын ыалдьыттар сэҥээрэ көрдүлэр. Күрэх кэмигэр Хонууттан Леонид Никулин аҕалбыт «банан» көлөтүгэр оҕолор эрэ буолбакка улахан дьон кытта хатааһылаан бырааһынньык көрө улаатта. Мустубут дьон үөрүүлэрин үллэстэн Тарыҥмыт көстүүтэ өссө киэркэйэн араас фотосессия ыытыллан үбүлүөйдээх күрэх үйэтилиннэ.