Быйыл оройуоҥҥа Аҕа сыла биллэриллэн, эр киһини өрө тутуу, оруолун үрдэтии соруга турар. Өбүгэ саҕаттан күүстээх аҥаардарбыт Ийэ дойдуну көмүскээн, дурда-хахха, эркин-тирэх буолан кэллэхтэрэ. Кинилэр тулуурдарынан, дьулуурдарынан, ханнык да ыарахантан чаҕыйбат булгуруйбат санаалаах эр хоһууттар буолаллар.
Оройуоҥҥа анал байыаннай дьайыыга сылдьар биир дойдулаахтарбытын өйүүр сыаллаах тэрээһиннэр араас көрүҥүнэн тиһигин быспакка ыытылла тураллар. Ол курдук аһымал кэнсиэртэр, дьаарбаҥкалар, биирдиилээн дьон көмөтө барыта кыайыы туһугар туһуланар.
Соторутааҕыта ОДьКХ тэрилтэтин, ООО “Сатал”, кииннэммит бухгалтерия уонна оҕо искусствотын оскуолатын холбоһуктаах кэнсиэртэрэ буолан ааста. Манна кыттыбыт ОДьКХ эр бэртэрин, хоһууттарын чорботон бэлиэтиир тоҕоостоох.
Дьиэ-уот коммунальнай хаһаайыстыбатын тэрилтэтэ бары нэһилиэккэ тыын боппуруоһу быһаарар, эппиэтинэстээх үлэлээх дьон манна баар. Ол үлэлэрин быыһыгар бары бииргэ мустан, эйэни харыстыаҕыҥ диэн санааны тутуһан аһымал акцияҕа кыттыстылар. Эр киһи айылҕаттан дьон көрүүтүгэр тахсарын наһаа сэҥээрбэт буолар. Ол да буоллар бу кэнсиэргэ үгүс эр дьон баарыттан киһи үөрэр.
Эдэр үлэһиттэр, дьиэ кэргэн аҕалара ырыаларынан-тойуктарынан, үнкүүлэринэн биир сомоҕо буолан биир тыынынан кэнсиэри ситэрэн-хоторон биэрдилэр. Хас биирдии сыанаҕа тахсыылара дохсун ытыс тыаһынан доҕуһуолланна, көрөөччү сэҥээриитин ылла.Кэнсиэр тутула, ис хоһооно, ыллыыр ырыалара эйэ, дьоллоох олох, төрөөбүт дойдуга таптал тиэмэтигэр сөп түбэһэр. Маннык тэрээһин кэннэ дойдуга бэриниилээх буолуу тыыныгар киһи куустарар, хорсун санааҕа ылларар.
ОДьКХ тэрилтэтин дириэктэрэ В.В.Корякин этэринэн, саҥа үлэһит манна элбэх эбит. Ол иһигэр билиилээх, кыһамньылаах эр бэртэрэ тэрилтэ үлэтэ быыстала суох биир тэтиминэн бара турарыгар ылсаллар. Эдэр уонна уопуттаах үлэһиттэр култуурнай-спортивнай тэрээһиннэртэн туора турбаттар. Ол курдук, АДС силиэсэрэ Николай Буртахов, силиэсэр Радион Дьяконов, оператор, сантехник Юрий Ильин, оператор Григорий Ильин, АДС сварщига Тыллыҥы Дьулусхан Буор Сыһыы уола, оператор Марк Третьяков, кылаабынай энергетик Николай Данилов, кылаабынай инженер Андрей Софронов, силиэсэр Семен Слепцов, инженер Анатолий Терехов. Тэрилтэ көхтөөх, уопуттаах испэсэлиистэрэ оператор Серафим Гореев, оператор, дизелист Василий Семенов эдэрдэргэ үтүө холобур буолаллар. Маны сэргэ кинилэр ортолоругар элбэх оҕолоох аҕалар элбэхтэр. Маннык эр дьоммутунан киэн туттабыт.
Бу тэрилтэттэн 6 киһи анал байыаннай дьайыыга баран, Ийэ дойдуларын көмүскүү сылдьаллар. Үлэһиттэр биир дойдулаахтарын өйөөн, кинилэр дьиэ кэргэттэригэр көмөлөрүн оҥороллор: муус, мас тиэйиитэ, тустаах дьоҥҥо араас үлэнэн, өйөбүлүнэн көмөлөһөллөр. Маннык үтүө санаа холобура барыбытын кыайыыга кынаттыыр.
Даҕатан эттэххэ, бу ый бүтэһигэр ОДьКХ тэрилтэтэ төрүттэммитэ 65 сылын туолар. Онно бэлэмнэнии үлэтэ барар.
Айталина Николаева.