Алтынньы 8-14 күннэригэр Хорватияҕа Пореч куоракка бэтэрээннэргэ көҥүл тустууга аан дойду чемпионата ыытылынна. Биир дойдулаахпыт бэтэрээннэргэ аан дойду икки төгүллээх чөмпүйүөн Семен Соркомов бу түһүлгэҕэ үрүҥ көмүс мэтээлгэ тиксэн үөрүүтүн үллэстэр: “Чемпионакка 50-55 саастаах бэтэрээн спорстменнарга 62 кг ыйааһыҥҥа туһуннум. Бастакы түһүлгэҕэ Япония бөҕөһүн кытта киирсэммин 8 : 2 очконан хоппутум, иккис эргииргэ Германия бөҕөһүн ыраастык кыайбытым. Үһүс эргииргэ Ливияттан спортсмен киирсиигэ тахсыбакка, быһа кыайыыны суруммутум. Полуфиналга Америка Холбоһуктаах Штаттарыттан бөҕөһүн балачча тыҥааһыннаахтык киирсэн 12 : 8 хоппутум. Финалга Казахстан бөҕөһүн кытта киирсиигэ кыһыылаахтык 1 :2 очконан сабырыйтаран хааллым. Онон үрүҥ көмүс мэтээлгэ тигистим.
Түгэнинэн туһанан, сырыым-айаным ороскуотун уйуммут оройуон даһалтатыгар, чуолаан баһылык э.т. Артур Александрович Тарабукиҥҥа уонна үлэлиир оскуолам директорыгар Александр Аргуновка кыттарга кыах биэрбиттэригэр истиҥ махталбын тиэрдэбин. Кыайыыбын дойдум дьонугар аныыбын. Ханна да сырыттарбын дьонум-сэргэм өйөбүллэрэ баар, миэхэ ыалдьалларын истэ-билэ сылдьабын, олус махтанабын”.
Муома дьоно Семен Прокопьевич аан дойду түһүлгэтигэр бэйэтин саастыылаахтарыгар дойдулар ааттаахтарын, таһымнаах маастардарын кытта тэҥҥэ киирсэн, үрдүк маастарыстыбаны көрдөрбүтүттэн олус үөрэбит, астынабыт, Санаттахха, 2016-2018 сылларга Македонияҕа, Польшаҕа ыытыллыбыт тустуу түһүлгэлэриттэн кыайыы көтөллөөх эргиллибитэ. Кини урукку тэтимин ыһыктыбакка, кыаҕын тута сылдьара, күүстээх санаатынан бар дьонугар үтүө холобур буолар.
Эҕэрдэлиибит!
«Муома оройуона» МТ пресс-сулууспата