Бүгүн Хонуу бөһүөлэгэр аҕыйах ахсааннаах хотугу норуоттар ассоциацияларын Муоматааҕы салаатын тэрийиитинэн оҕолорго аналлаах «Эвинек» күрэхтэһии ыытылынна. Төһө да күнэ суох хаардаах күн турдар бырааһынньыкка дьон-сэргэ мустубут. Кыттааччылар тустаах тордохторун иһин-таһын киэргэтэн, ас бөҕө астаан дьиҥнээх таба ыстаадатын санатта. «Эвинек» күрэххэ 6 хамаанда хас да этабынан күрэхтэстэ. Дьон болҕомтотун эҕэрдэ нүөмэрдэр тартылар. Улахан Чыыстайтан сылдьар «Һоҥҥачаан» ансамбль уолаттара бэртээхэй үҥкүү бэлэхтээн көрөөччүлэр биһирэбиллэрин ыллылар. Хамаандалар эбээн бүлүүдэлэрин күрэҕэр араас аһы астаан жюри иннигэр туруордулар. Эбээн норуотун национальнай көстүүмнэрин кэппит оҕолор бэйэлэрин тордохторун киэргэллэрин кэпсээтилэр, бүлүүдэлэрин билиһиннэрдилэр. Спортивнай күрэхтэһиилэр киэҥ программалара элбэх оҕону түмтэ. Бырааһынньык эбээн норуотун үҥкүүтүнэн — Һээдьэнэн түмүктэннэ.
